Túrkistan oblysynda taý basynan qulap ketken týrıstiń denesi tabyldy
Túrkistan oblysy TJD baspasóz qyzmetiniń málimetine súıensek, qazir qutqarýshylar 56 jastaǵy azamattyń denesin taýdan túsirý jumysyn júrgizip jatyr.
«Búgin Túrkistan oblysy TJD qutqarýshylarynyń kúshimen teńiz deńgeıinen 3800 metr bıiktikte 1967 jyly týǵan adamnyń denesi tabyldy. Qazirgi ýaqytta ony jaıaý túsirý jumystary júrip jatyr. Qalyńdyǵy 20 sm qar jamylǵysy, jer bederiniń taýly, tasty bolýy túsirý jumystaryn qıyndatýda. Іzdeý-qutqarý jumysyna Túrkistan oblysynyń jedel-qutqarý jasaǵynyń qutqarýshylary men Alpınızm federatsııasynyń kásibı alpınısteri jumyldyryldy», - delingen tótenshe jaǵdaılar mınıstrligi taratqan aqparatta.
Aıta keteıik, Tólebı aýdanyndaǵy Saıram shyńyn baǵyndyrmaq bolǵan er adam qaıtar joldaǵy qaýipti aýmaqta tómen qulap ketken bolatyn.
Onyń qasynda áıeli men dosy bolǵan.
Aýa raıynyń qolaısyzdyǵyna baılanysty týrıstiń denesin izdeý jumystary barysynda birshama qıyndyq týdy.
Al keshe qutqarýshylar izdeý jumystarynyń vıdeosyn jarııalady.
