Túrkistan oblysynda tasqynǵa tap bolǵan aýdandardaǵy sý sapasy kúnde tekseriledi – Ekologııa mınıstrligi
NUR-SULTAN. QazAqparat – Túrkistan oblysynda tasqynǵa tap bolǵan aýdandardaǵy sý sapasy kúndelikti tekseriledi. Bul týraly tolyǵyraq Ekologııa, geologııa jáne tabıǵı resýrstar vıtse-mınıstri Ahmetjan Pirimqulov aıtyp berdi, dep habarlaıdy QazAqparat tilshisi.
«14 mamyrda Ekologııa, geologııa jáne tabıǵı resýrstar mınıstri Maǵzum Myrzaǵalıev Ózbekstannyń sý sharýashylyǵy mınıstrimen Shymkentte kezdesý ótkizdi. Kelissózder barysynda Sardoba sý qoımasyna halyqaralyq jáne qazaqstandyq sarapshylardyń qatysýymen tehnıkalyq aýdıttiń júrgiziletini jaıly sheshim qabyldandy. Osy tekseristiń nátıjesi boıynsha sý qoımasynyń taǵdyry naqty sheshiledi», - dedi Ahmetjan Pirimqulov.
Onyń aıtýynsha Túrkistan oblysyndaǵy tótenshe ahýaldyń alǵashqy kúninen bastap oqıǵa ornynda «Qazgıdromet» mamandary jumys júrgizip, kún saıyn monıtorıng jasaýda. Olar kúndelikti sondaǵy sý sapasyn tekserip jatyr.
«Qazirgi tańda adamdardyń ómiri men densaýlyǵyna zııan keltiretindeı qandaı da bir zııandy zattar kezdesken joq. Monıtorıng jalǵasady. Onyń nátıjesi týraly alda qosymsha habarlaımyz», - deıdi vıtse-mınıstr.
