Túrkistan oblysynda taksısti uryp-soǵyp, kóligin tartyp alǵan
QAZYǴURT. QazAqparat – Túrkistan oblysynda belgisiz adamdar taksı júrgizýshisin qorqytyp, kóligin tartyp alǵan. Bul týraly óńirlik Polıtsııa departamentinen málim etti, dep habarlaıdy QazAqparat.
Qazyǵurt aýdandyq polıtsııa bólimine Ordabasy aýdanynyń turǵyny aryzdanǵan. Ol Shymkent qalasyndaǵy taksı fırmasyna tıesili kólikpen jolaýshy tasymalymen aınalysady. Aryzynda aıtylǵandaı, belgisiz 2 jas jigit Qazyǵurtqa aparyp-kelýdi ótingen. Jolda ózin uryp-soǵyp, óltiremin dep qorqytý arqyly 600 myń teńge talap etken. Taban astynan ondaı aqsha taýyp bere almaǵan soń, avtokóligin kúsh qoldanyp, tartyp alǵan.
«Jábirlenýshiniń aıtýynsha, túngi saǵat 1-2-de jolda júrgen kólikter men adam aıaǵy saıabyrsyǵannan keıin qaltalaryndaǵy pyshaqtarymen qorqytyp, aqsha talap etken. Aqsha bolmaǵan soń, júrgizýshini óltiremiz dep, kúsh qoldana bastaıdy. Osy sátte jábirlenýshi júrip bara jatqan kólikten túsip úlgergen. Dene jaraqatyn alǵan júrgizýshi joldan kólik toqtatyp, aýdandyq polıtsııa bólimine kelgen. Aýdandyq polıtseıler kúdiktilerdi ustaý boıynsha dereý iske kiristi. Jedel-izdestirý sharalaryn júrgizdi. Jábirlenýshi men kýágerlerden jaýap alyp, kólikti izdestire bastady», - delingen oblystyq PD aqparatynda.
Nátıjesinde jábirlenýshiniń kóligi oqıǵa ornynan 50 shaqyrym qashyqtyqta Saryaǵash aýdanynan tabyldy. Kúdiktilerdiń jeke bastary anyqtalyp, bireýi Nur-Sultan qalasyna qashyp bara jatqan jerinen Qordaıdan ustaldy. Al, ekinshisi Shymkent qalasyndaǵy jaldamaly páterden quryqtaldy. Kúdikti jas jigitterdiń ekeýi de Saryǵash aýdanynyń turǵyndary, jumyssyz bolyp shyqty. Polıtseıler tabylǵan kólikti zańdy ıesine qaıtardy. Atalǵan fakti QR QK-niń 194-baby («Qorqytyp alý») boıynsha tirkeýge alyndy.
«Kúdiktiniń ekeýi de qamaýda. Qazirgi tańda sotqa deıingi tergeý amaldary júrgizilýde. Túrkistan oblysy polıtseıleri azamattarǵa jeke bastaryńyzdyń qaýipsizdigin birinshi orynǵa qoıýǵa keńes beredi. Alys saparlarǵa shyǵarda, jalǵyz júrmeý kerektigin, syrt kelbeti kúdikti, tanys emes azamattarǵa senim bildirmeý kerektigin eskertedi», - dedi polıtsııadan.
