Túrkistan oblysynda taǵy jeti kólik soqtyǵysyp qaldy
SARYAǴASh. QazAqparat – Túrkistan oblysynda taǵy da jol kólik oqıǵasy oryn alyp, jeti birdeı kólik soqtyǵysyp qaldy. Jol apaty búgin túski saǵat 13:00-der shamasynda «Almaty-Termez» tasjolynyń Saryaǵash aýdany aýmaǵynda bolǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jolda ketip bara jatqan «Volvo» júk kóligi jol apatynyń oryn alýyna sebep bolǵan. «Volvo» júk kóligi aýa raıynyń qolaısyzdyǵynan ári asfalt betiniń muzdanyp, taıǵaq bolýynyń saldarynan «Toıota Kamrı» avtokóligine soqtyǵysqan. Sonyń saldarynan «Gazel» avtokóligi «Shevrolet» kóligimen soqtyǵysqan. Dál osy sátte bir baǵytta ketip bara jatqan «VAZ» avtokóligi «Deý Neksııa» avtokóligine, al oǵan «Deý Matız» kóligi soǵysqan. Jol kólik oqıǵasynan eshkim zardap shekpegen.
«Atalǵan jaıt boıynsha Saryaǵash APB-den jedel-tergeý toby attanyp, shuǵyl túrde tergep tekserý amaldaryn júrgizdi. Qazirgi ýaqytta tergep-tekserý amaldary júrgizilýde. Kináli júrgizýshiler anyqtalýda» delingen habarlamada.
Eske salaıyq, kúni keshe osy joldyń Qazyǵurt aýdany aýmaǵynda tórt birdeı kólik soqtyǵysyp, 15 adam zardap shekken bolatyn. Jaraqat alǵan 14 jolaýshy aýrýhanaǵa jetkizilip, 8-i adam jansaqtaý bólimine jatqyzyldy. Taǵy úsh adamnyń jaraqat bóliminde em qabyldap jatqanyn habarlaǵanbyz. Búgin eki naýqas jansaqtaý bóliminen jaraqat bólimshesine aýystyryldy.
