Túrkistan oblysynda taǵy úsh aýylǵa gaz jetti
TÚRKІSTAN. QazAqparat -Túrkistan oblysyna qarasty Tólebı aýdanynda úsh eldimeken kógildir otynmen qamtyldy. Alataý aýyldyq okrýgine qarasty Jańaturmys, Qaınar, Nysanbek eldimekenderi turǵyndarynyń qýanyshymen oblys ákimi Janseıit Túımebaev bólisti, dep habarlaıdy QazAqparat tilshisi.
Qazirgi tańda Tólebı aýdanynda jalpy sany 55 eldi mekenniń 39-na tabıǵı gaz jetkizildi. Taýly aýdandaǵy kógildir otynmen qamtý úlesi halyqtyń 82 paıyzyn quraıdy. Atalǵan úsh eldimekendegi 2,5 myńǵa jýyq turǵyn endi úılerin gazben jylytatyn boldy.
«Óńirimizdegi basqa qala-aýdandarmen salystyrǵanda Tólebı aýdanynyń eldimekenderin tabıǵı gazben qamtý isi qarqyndy júrýde. ıAǵnı, aldaǵy birer jylda aýdandaǵy barlyq eldimekender gazdandyrylyp, qalanyń jaǵdaıyna jetetin bolady. Munyń barlyǵy Elbasynyń jyl saıynǵy Joldaýlary men tıisti mindettemeleriniń arqasynda múmkin bolyp otyr», - dedi oblys basshysy.
Aıta keteıik, 2017-2018 jyldary aýdandaǵy 8 eldimekendegi (Maıbulaq, Qostóbe, Ońtústik, Hanaryq, Jambyl, Jańaturmys, Nysanbek, Qaınar) qurylys jumystaryna oblys bıýdjetinen 928,4 mln teńge bólinip, tabıǵı gazben qamtý tolyǵymen aıaqtaldy. Osy jyly qosymsha 2 eldimekende (Qaratóbe, Tasaryq) gazdandyrý júrgizildi. Qubyr tartý jumystary aıaqtalǵan 10 eldimekendi kezeń-kezeńimen gazǵa qosý jumystary josparlanyp otyr. Gazdanbaǵan 6 eldimeken boıynsha JSQ ázirleý maqsatynda oblystyq, aýdandyq bıýdjetten 50 mln teńgege jýyq qarjy qarastyrylyp, tıisti qujattar ázirlendi. Jalpy 2019-2020 jyldar aralyǵynda aýdan halqyn tolyqtaı tabıǵı gazben qamtamasyz etý josparlanǵan.
