Túrkistan oblysynda taǵy eki sý qoımasy salynady

ASTANA. QazAqparat – Túrkistan oblysynda «Báıdibek ata» jáne «Boraldaı» sý qoımalary salynady. Óńir ákimi Darhan Satybaldy ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Túrkistan óńirindegi aımaqtarda sý tapshylyǵyn sheshý úshin birneshe sý nysanynyń qurylysy bastalyp, byltyr 2 nysan paıdalanýǵa berildi. «Keńsaı-Qosqorǵan-2» sý qoımasyn salǵannyń arqasynda jylyna qosymsha 34 mln tekshe metr aǵyn sý jetkizýge múmkindik paıda boldy. Al Túrkistan magıstraldy kanalynyń 59 shaqyrymyn betondaý arqyly 60 mln tekshe metr sý únemdeldi», - dedi ol.

Ákimniń aıtýynsha, bul baǵyttaǵy jumys jalǵasyn tabady.

«Budan bólek, «Báıdibek ata» jáne «Boraldaı» sý qoımalary salynady. Óńirde kanaldardy tazalaý, jóndeý jumystary turaqty jalǵasyp jatyr», -dedi Darhan Satybaldy.