Túrkistan oblysynda taǵy bir shańǵy trassasy men arqandy jáne bógen joldary salynady
TÚRKІSTAN. QazAqparat – Túrkistan oblysynda «Qasqasý» týrıstik-rekreatsııalyq ortalyǵynyń jobasyn júzege asyrý kózdelip otyr. Bul joba «KaskasuResort» JShS jáne «Túrkistan» ÁKK» AQ arqyly iske asyrylmaq, dep habarlaıdy QazAqparat tilshisi.
«Túrkistan» áleýmettik kásipkerlik korporatsııasy» AQ baspasóz qyzmetiniń málimetinshe, joba boıynsha Tólebı aýdanynan taýly ınfraqurylym men kommertsııalyq aımaq salynbaq. Teńiz deńgeıinen 1 750-den 3 200 metrge deıingi bıiktikte shańǵy trassalary men arqandy jáne bógen joldarynyń qurylysy júrgiziledi. Sondaı-aq, qonaqúıler, meıramhanalar, akvapark, Alpi aýyldary, oıyn, sport jáne jattyǵý ortalyqtary ornalasatyn bolady. Jalpy, Saıram-Ógem tabıǵı ulttyq parki aýmaǵynda 360 ga jerde ornalasqan keshen aımaqtyń baı týrıstik ınfraqurylymyn damytýǵa baǵyttalǵan.
Eske sala ketsek, 2019 jyly «Qasqasý» týrıstik-rekreatsııalyq ortalyǵy taý ınfraqurylymynyń jobasy Túrkistan oblysynyń 2024 jylǵa deıingi áleýmettik-ekonomıkalyq damýynyń keshendi josparyna engizilgen bolatyn. 2020 jyly «Túrkistan» ÁKK taý-ken ınfraqurylymynyń birinshi fazasyn iske asyrýǵa kirisýdi josparlap otyr. Búgingi tańda nysannyń tehnıka-ekonomıkalyq negizdemesine oń qorytyndy alynyp, jobalyq-smetalyq qujattama ázirlendi. Qazir barlyq qujattar saraptamaǵa jiberilgen.
