Túrkistan oblysynda taǵy bir munaı óńdeý zaýyty salynady

TÚRKІSTAN. QazAqparat - Túrkistan oblysynda jylyna 2 mln tonna munaı óńdeıtin zaýyt salynady. Jalpy quny 95 mlrd teńge bolatyn ınvestıtsııalyq joba aıasynda myńǵa tarta jumys orny ashylmaq, dep habarlaıdy QazAqparat tilshisi.

«Turkistan Invest» ınvestıtsııalyq kompanııasy baspasóz qyzmetiniń málimetinshe, jańa zaýyttyń qurylysy Ordabasy aýdanynda júrgizilmek. Ony salýǵa qazaqstandyq «Standard Petroleum & Co LLP» kompanııasy qarajat jumsaıdy. Búgingi kúni 250 gektar aýmaqta ornalastyrý jumystary júrgizilip, qorshaýlar qoıylyp jatyr. Sondaı-aq, elektr jelileri tartylyp, jol salynýda.

«Túrkistan» ƏKK» AQ fılıaly - «Turkistan Invest» ınvestıtsııalyq kompanııasynyń qoldaýymen júzege asyrylatyn joba 2021 jyly iske qosylady dep kútilýde. Daıyn ónim el aýmaǵynda satylyp, qosymsha TMD elderine eksporttalatyn bolady.