Túrkistan oblysynda sybaılas jemqorlyqtyń aldyn alý máselesi talqylandy
Oblys ákiminiń birinshi orynbasary Arman Jetpisbaıdyń jetekshiligimen ótken jıynda osy baǵytta atqarylyp jatqan jumys barysy baıandalyp, ári qaraı da pármendi sharalar júrgizý tapsyryldy
Basqosýda sondaı-aq, jańadan engizilgen reformalar týraly jáne memlekettik qyzmetshiler men memlekettik fýnktsııalardy oryndaýǵa ýákilettik berilgen tulǵalarǵa qatysty engizilgen tyıymdar týraly túsindirme jumystaryn kúsheıtý júkteldi.
«Jemqorlyqtyń aldyn alý boıynsha mekemeishilik májilis jasaýmen ǵana shektelmeı, pármendi sharalar qabyldaýlaryńyz qajet. Barshańyzǵa málim, zańnamaǵa engizilgen sońǵy ózgeristerge sáıkes, qaramaǵyndaǵy qyzmetkerler úshin birinshi basshy jaýap beredi. Osyny esten shyǵarmaý kerek. Sybaılas jemqorlyqpen kúres - árbir azamattyń mindeti»,-dedi oblys ákiminiń birinshi orynbasary.
Arman Jetpisbaı sonymen qatar, árbir ákim men tıisti memlekettik organ basshysy, qyzmetkerler jumys barysynda zańdylyqtyń saqtalýyna jáne qabyldanǵan sharalar jónindegi aqparattardyń ashyq jáne qoljetimdi bolýyna múddeli bolýy tıis ekenin atap ótti.
Májilis qorytyndysy boıynsha qala, aýdan ákimderine jáne oblystyq basqarma basshylaryna birqatar tapsyrmalar berildi.