Túrkistan oblysynda sybaılas jemqorlyq qylmystarymen kúres zańy túsindirildi
Bul týraly QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Ǵanıjan Asanuly baspasóz brıfınginde málimdedi, dep habarlaıdy QazAqparat tilshisi.
«Baǵynyshty qyzmetkerlerdiń arasyndaǵy sybaılas jemqorlyq úshin basshylardyń jeke jaýapkershiligin kúsheıtý jáne sybaılas jemqorlyqqa qarsy saraptama ınstıtýtyn qalpyna keltirý týraly» taqyrybynda ótken baspasóz máslıhatynda sybaılas jemqorlyqqa qarsy is-qımyl máseleleri boıynsha keıbir zańnama aktilerine jańashyldyqtar engizilgeni aıtyldy.
«Táýelsiz Qazaqstan tarıhynda tuńǵysh ret basshylardyń qol astyndaǵy qyzmetkerleri úshin jaýapkershiligi zańnamalyq deńgeıde bekitildi. Budan bylaı, saıası memlekettik qyzmetkerler-mınıstrler men olardyń orynbasarlary, oblystardyń, Nur-Sultan, Almaty, Shymkent qalalary men oblys ákimderi men olardyń orynbasarlary, aýdan ákimderi olardyń tikeleı baǵynyshty qyzmetkerleri sybaılas jemqorlyq quqyq buzýshylyq jasaǵan jaǵdaıda mindetti túrde otstavkaǵa ketýge suraný kerek»,- dedi Ǵanıjan Asanuly.
Atalǵan Zańdaǵy ózgeriske sáıkes, birinshi basshy onyń tikeleı baǵynyshty qyzmetkerine qatysty sottyń aıyptaý úkimi kúshine engennen soń kúntizbelik 10 kún ishinde nemese aqtalmaıtyn negizder boıynsha qylmystyq is toqtatylǵannan keıin otstavkaǵa ketýge mindetti bolady.
«Ortalyq memlekettik organnyń basshysy (mınıstr) úshin – bul onyń orynbasarlary, jaýapty hatshy nemese apparat basshysy, aımaqtyq bólimshelerdiń basshylary jaýapty bolady. Sondaı-aq, oblys, respýblıkalyq mańyzy bar qalalar, astana ákimi úshin – onyń orynbasarlary, apparat basshysy, aýdannyń (oblystyq mańyzy bar qalanyń) ákimi jaýap beredi. Budan bólek, ortalyq memlekettik organ basshysynyń orynbasary (vıtse-mınıstr) onyń qaramaǵyndaǵy bólimshe nemese táýelsiz qurylymdyq bólimshe basshysy sybaılas jemqorlyq qylmys jasaǵan kezde qyzmetinen ketedi. Al, oblys ákiminiń orynbasary jergilikti bıýdjetten qarjylandyrylatyn atqarýshy organdardyń basshylaryna jaýap beredi. Sonymen qatar aýdan ákimi óziniń orynbasarlaryna, apparat basshysyna, jetekshilik etetin aýdandyq atqarýshy organdardyń basshylaryna, aýyl, kent, aýyldyq okrýgterdiń ákimderine jaýap beredi», – dedi Ǵanıjan Asanuly.
