Túrkistan oblysynda sýǵa ketkenderdiń jartysynan astamy – balalar
TÚRKІSTAN. QazAqparat – Túrkistan oblysynda shomylý maýsymy bastalǵaly 49 adam kóz jumdy. Sonyń jartysynan astamy – kámeletke tolmaǵan balalar. Bul týraly Óńirlik kommýnıkatsııalar qyzmetinde óńirlik Tótenshe jaǵdaılar departamenti bastyǵynyń orynbasary Sultanǵalı Smaılov málim etti, dep habarlaıdy QazAqparat.
«Bıylǵy jyldyń basynan beri jazataıym oqıǵalar saldarynan 49 adam kóz jumdy. Onyń 28-i kámeletke tolmaǵan balalar bolsa, 21-i eresek adamdar. Atap aıtqanda, 13 bala ata-ananyń qaraýynsyz qalǵan. 8 bala ruqsat etilmegen jerde shomylǵan. Kámeletke tolmaǵan 2 bala Saryaǵash, Maqtaaral aýdandarynda shomylýǵa arnalǵan demalys ortalyqtarynyń basseınderinde jáne 2 adam balyq aýlaý kezinde ajal qushty. Sondaı-aq qudyqtar men septıkterge túsip ketip, kóz jumǵandar da bar», – dedi S. Smaılov.
Qaıǵyly oqıǵalardyń negizgi sebepteri: shomylýǵa ruqsat etilmegen oryndarda shomylý; júze bilmeý jáne óz kúshin durys baǵalamaý; balalardy sý jaǵalaýynda úlkenderdiń qaraýynsyz qaldyrý; jeke qutqarý quraldarynsyz balyq aýlaý; alkogoldi ishimdikterdi paıdalanyp sýǵa shomylý.
Sondaı-aq departament bastyǵynyń orynbasary orman órtterine qatysty ahýal jóninde málim etti.
«17 mamyrda oblys aýmaǵyndaǵy orman sharýashylyǵyna tıisti mekemelerdiń qatysýymen sozylmaly tabıǵı órtterdi sóndirý boıynsha órt-taktıkalyq oqý-jattyǵý ótkizildi. Sondaı-aq qala, aýdan ákimdikteri tıisti aýyl okrýgterinde jalpy 11626 adamnan turatyn 979 erikti órt sóndirý qurylymy, sonymen qatar Saıram, Túlkibas, Qazyǵurt aýdandarynda órt sóndirý beketteri quryldy. Oblystaǵy 12 orman sharýashylyǵy jazǵy órt qaýipti maýsymǵa daıyndyq jumystaryn tolyq júrgizilgen. Jyl basynan beri orman qory jerlerinde órt qaýipsizdigi qaǵıdasyn buzý boıynsha 10 jeke tulǵaǵa hattama toltyrylyp, 164125 myń teńge aıyppul salynyp, óndirildi», – dedi S.Smaıylov.
