Túrkistan oblysynda sýǵa ketkenderdiń teń jartysynan astamy - balalar
TÚRKІSTAN. QazAqparat - Túrkistan oblysynda jyl basynan beri 8 adam sýǵa ketip, ajal qushqyn. Olardyń altaýy - balalar, dep habarlaıdy QazAqparat tilshisi.
Oblystyq TJD bastyǵynyń orynbasary Erik Sarybaevtyń aıtýynsha, ótken jylmen salystyrǵanda óńirde qaıǵyly oqıǵalar sany 37,5% - ǵa artqan.
«Qańtar aıynda Shardara aýdany, Uzyn ata aýylynda turatyn bir otbasynyń úsh balasy «Vostochnyı kollektor» kanalyna aǵyp ketken. Taǵy úsh jaǵdaı Jetisaı aýdanynda, eki jaǵdaı Arys qalasy men Qazyǵurt aýdanynda oryn alyp otyr. Sýda qaza bolýdyń negizgi sebepteri - ishimdik ishý, balalardyń ata-anasynyń qaraýynsyz qalýy. Oblystyń sý aıdyndarynda 44 eskertý jáne tyıym salý belgileri ornatylǵan. Soǵan qaramastan, sýǵa batý oqıǵalary kóbeıip otyr», - deıdi Erik Sarybaev.
