Túrkistan oblysynda sýǵa ketken adamdar sany azaımaı otyr - TJD
TÚRKІSTAN. QazAqparat - Túrkistan oblysynda sýdaǵy jazataıym oqıǵalar bolýy múmkin qaýipti aımaqtardy anyqtaý jumystary júrgizilip, 139 oryn qaýipti dep tanylǵan. Bul týraly búgin Óńirlik kommýnıkatsııalar qyzmetinde ótken brıfıngte Túrkistan oblysy tótenshe jaǵdaılar departamentiniń bastyǵy Nurǵalı Júnisov málimdedi, dep habarlaıdy QazAqparat tilshisi.
Nurǵalı Júnisovtiń sózinshe, jyl saıyn óńirde «Qaýipsiz jaz», «Sýdaǵy qaýipsizdik» syndy saqtyq sharalary uıymdastyrylady. Alaıda, oblys boıynsha TJ júrgizilgen monıtorıng nátıjesi boıynsha sýda qaza bolǵan adamdardyń sany azaımaı turǵanyn kórsetedi. Osyǵan baılanysty departament bastyǵy oblys turǵyndaryn saqtyq sharalaryn qatań saqtaýǵa shaqyrdy. Brıfıng barysynda sondaı-aq, dala órtterine qatysty da málimetter aıtyldy. Belgili bolǵandaı, aǵymdaǵy jyly oblys aýmaǵynda orman órti tirkelmegen. Al, 2018 jyly 3 dala órti oryn alyp, nátıjesinde 462 gektar jer otqa oranǵan. Osyndaı tótenshe jaǵdaılardyń aldyn alý úshin departament bastamasymen bolýy múmkin orman jáne dala órtterin sóndirý boıynsha ózara is-qımyl tájirıbe júzinde órt-taktıkalyq oqý-jattyǵý ótkizilgen.
«Bul is-sharaǵa oblystyń Tabıǵı resýrstar jáne tabıǵat paıdalanýdy retteý basqarmasy, Túrkistan oblystyq orman sharýashylyǵy jáne janýarlar dúnıesi aýmaqtyq ınspektsııasy, Túrkistan oblysy Tótenshe jaǵdaılar departamenti, «Órt sóndirý jáne avarııalyq qutqarý jumystary qyzmeti» memlekettik mekemesi qyzmetkerleri jáne oblystyq orman sharýashylyqtary, jalpy alǵanda 200-den astam adam, 42 tehnıka, onyń ishinde: 12 órt sóndirý tehnıkasy, 14 traktor, 16 birlik orman sharýashylyq patrýldik avtokólikter qatystyryldy», - dedi Nurǵalı Júnisov.
Aıta keteıik, óńirde 12 orman sharýashylyǵy ornalasqan. Onyń ishinde QR Aýyl sharýashylyǵy mınıstrliginiń Janýarlar álemi jáne orman sharýashylyǵy komıtetine qarasty 5 orman sharýashylyǵy bar.
