Túrkistan oblysynda sý tasqynynan kelgen shyǵyn tolyq óteledi - ákimdik
TÚRKІSTAN OBLYSY. QazAqparat – Maqtaaral aýdanynda bolǵan tótenshe jaǵdaıǵa baılanysty qurylǵan arnaıy komıssııa tasqynnan kelgen shyǵyn kólemin esepteýde, dep habarlaıdy QazAqparat ákimdikke silteme jasap.
Bılik basshylary tasqyn sý oryn alǵan aýyldardyń halqymen kezdesip, túsindirý jumystaryn júrgizýde. Maqtaaral aýdanynyń ákimi Baqyt Asanov tasqyn sý astynda qalǵan aýyldardyń turǵyndarymen júzdesti. Qaýipsiz aýmaqqa kóshirilgen halyqqa Úkimet tarapynan naqty kómek kórsetiletinin atap kórsetti.
Túrkistan oblysyndaǵy tasqynǵa baılanysty qurylǵan memlekettik komıssııaǵa topan sýdan kelgen shyǵyndy eseptep, aýyldardy qalpyna keltirý, ınjenerlik jelilerdi jóndeý jáne zardap shekken halyqqa áleýmettik kómek kórsetý júktelgen.
Sonymen qatar, zardap shekken aýyl azamattarynyń árqaısysyna ótemaqy tólenedi.
Ózbekstanmen shekaralas ornalasqan Maqtaaral aýdanyndaǵy 5 aýyldyń 845 úıin sý basty. Jeńis, Órgebas, Dostyq, Jańaturmys, Fırdoýsı aýyldaryndaǵy apatty joıýǵa myńǵa jýyq qutqarýshy men 200-deı tehnıka tartylǵan.
Sondaı-aq, sý astynda qalǵan aýyldardyń kireberisine blok-beketter qoıylyp, josyp ketken jurttyń dúnıe-múlkin tártip saqshylary kúzetýde.
Aýdandaǵy 7639 gektar egindik qyzyl sýdyń astynda qalǵan. Bul alqaptyń basym bóligine maqta egililgen. Mamandar naqty shyǵyn kólemin anyqtaý ústinde. Sý alǵan aýyldardyń irgesinde ornalasqan taǵy 5 eldimekendi oblys ákimdigi, oblystyq Tótenshe jaǵdaılar departamenti, QazSÝShar jáne aýyl turǵyndarynan quralǵan volonterlerdiń kómegimen sý basý qaýpinen shyǵaryldy. Sonyń ishinde atap ótetin strategııalyq mańyzy zor 14 myńnan astam halqy bar Myrzakent eldimekeni qyzyl sý basýdan aman qaldy.
Jerlesterimen júzdesken Maqtaaral aýdanynyń ákimi áleýmettik jeliler, messendjerler men BAQ arqyly tarap jatqan sý tasqyny jónindegi túrli burmalaýshylyqtarǵa qatysty óz pikirin bildirdi.
«Halyq durys, ıaǵnı, resmı shynaıy aqparat alýy kerek. BAQ-ta, ásirese áleýmettik jelilerde aýmaqtaǵy jaǵdaıǵa qatysty eldi dúrliktiretin jalǵan aqparattar taralyp jatyr. Eń bastysy, adam shyǵynynan amanbyz. Al, shyǵyndar eseptelip, tolyq óteledi. Jan-jaqtan kómek kórsetip jatqan jerlesterimizge rahmet aıtamyn. Oryn alǵan jaǵdaıda jalpy jaýapkershilik bolýy qajet, sonyń ishinde jýrnalıster de óz jumysyna jaýapkershilikpen qarasa eken»,-dedi aýdan basshysy.
Baqyt Asanov jalǵan aqparat taratqany úshin ákimshilik jáne qylmystyq jaýapkershilikke tartylatyndyǵyn eskertti. Maqtaaral aýdanyndaǵy 24 evakýatsııa oryndaryndaǵy 3500-ge jýyq turǵynnyń búgingi jaı-kúıi birqalypty. Barlyǵy derlik medıtsınalyq tekseristen ótkizilip, jatyn oryn men kórpe-tósekpen tegis qamtylǵan. Olarǵa kúnine úsh mezgil tamaq úlestirilýde. Azyq-túlik pen jeke bas gıgıenasyn saqtaýǵa qajetti kerek-jaraqtyń bári jetkizilip berilýde. Al, ózge de qajetti zattar men azyq-túlik túrleri árbir evakýatsııa oryndaryna tótenshe jaǵdaıǵa baılanysty jasaqtalǵan ortalyq qoımadan tizim arqyly úlestirilýde. Evakýatsııa oryndary bop bekitilgen mektepter men kolledj, meshitterde ornalasqan turǵyndar osyndaı qıyn-qystaý kezeńde qol ushyn sozyp jatqan memleket basshylyǵyna, úkimetke, oblys, aýdan basshylyqtaryna jáne barlyq qazaqstandyqtarǵa shynaıy alǵystaryn aıtýda.
