Túrkistan oblysynda sý tasqynynan keler qaýip joq

TÚRKІSTAN. QazAqparat - Túrkistan oblysynda sý tasqynynan keletin qaýip joq. Óńirdegi sel júrýi múmkin aımaqtardyń barlyǵy turaqty baqylaýǵa alynǵan. Bul týraly Óńirlik kommýnıkatsııalar qyzmetinde ótken baspasóz jıynynda oblys boıynsha tótenshe jaǵdaılar departamentiniń basshysy Nurǵalı Júnisov málimdedi, dep habarlaıdy QazAqparat oblys ákiminiń baspasóz qyzmetine silteme jasap.

Onyń sózinshe, aımaqtaǵy sý qoımalary men ózenderdiń sý rejımine kúndelikti monıtorıng jasalyp otyr.

«Oblys aýmaǵynda tasqynǵa qarsy is-sharalar júıeli túrde júrgizilip jatyr. Syrdarııa ózeninen bastaý alatyn kanaldardyń bas tospasy bekitildi. Oǵan 50 myń qap qum, 30 tonna JJM, 584 shatyr, 4622 kerýet, 36 myń adamǵa arnalǵan tósek oryn daıyndaldy. Sondaı-aq, jalpy uzyndyǵy 5,2 shaqyrymdyq ózenderde jaǵa bekitý jáne arna túzeý jumysy júrgizilip, 14 shaqyrym qorǵanys bógeti turǵyzyldy. 24 shaqyrymnan astam kanaldar men 7,2 shaqyrym drenajdy júıeler mehanıkalyq tazartýdan ótkizildi. Syrdarııa ózeniniń jaǵalaýyndaǵy 20 eldi mekendegi qulaqtandyrý júıesine 120 mln teńge bólinip, jańartyldy», - dedi departament basshysy.

Jalpy oblys boıynsha sý qoımalarynyń ortasha tolýy 55-60%-dy quraıdy. Tasqyn sýdy qabyldaýǵa jetkilikti qor bar, al ózenderdegi sýdyń ótýi orta deńgeıden tómen.

Oblys aýmaǵynda sý tasqyny jaǵdaıy Syrdarııa ózenimen tikeleı baılanysty bolǵandyqtan ol qatań baqylaýǵa alynǵan. Búgingi tańda ózenniń arnasynda sýdyń aǵysy qalypty, jaǵalaýdaǵy eldi mekenderge qaýip joq. Al, taýdaǵy jınalǵan qar qory normadan tómen, aýmaqtyń jazyq jerlerinde qar joq.

Aıta keteıik, 2017 jyly josparlanǵan 42 is-shara tolyq aıaqtalǵan. Byltyr josparlanǵan 40 is-sharanyń 31-i tolyq aıaqtalyp, 9-y 2019 jyldyń jarty jyldyǵynda iske asyrylady. Al, 2019 jyly ótkiziletin 16 is-sharaǵa oblystyq bıýdjetinen 990 mln teńge qaralǵan.