Túrkistan oblysynda sý tasqynymen kúres: 11 shaqyrym aryq qazyldy
TÚRKІSTAN. QazAqparat - Túrkistan oblysyndaǵy sý tartý jumystary osy aptada aıaqtalady, dep habaraıdy QazAqparat tilshisi.
Tolassyz jaýǵan jańbyr Maqtaral men Jetisaı aýdandarynyń turǵyndaryna qolaısyzdyq týdyrdy. Jaýyn-shashyn mólsheri 16 kúnde bir aılyq normadan 68%-ǵa deıin asyp túsken. Qos aýdanda sý tartý jumystary áli de júrip jatyr. Bul týraly Ortalyq kommýnıkatsııalar qyzmetinde ótken brıfıngte Túrkistan oblystyq tótenshe jaǵdaılar departamentiniń bastyǵy Nurǵalı Júnisov habarlady.
Aǵyndy sýdy burý úshin 11 shaqyrymnan astam aryq qazylǵan. 96 shaqyrymdyq 32 kanal men 241 shaqyrym bolatyn 121 kollektor tazartyldy.
«Jumys bastalǵannan beri 600-den astam aýla aýmaǵynan 214 416 tekshe metr sý tartyldy. 24 kanaldaǵy sýdyń deńgeıi tómendetildi. Jaǵdaıdyń kúrdelenýine baılanysty oblystyń basqa da aýdandarynan TJD qurylymdyq bólimderiniń kúshi jumyldyryldy. Jalpy bul jumystardy 337 qyzmetker atqaryp, 131 motopompa jáne 37 tehnıka paıdalanyldy. Aýlalardan jáne úılerge jaqyn aýmaqtardy sýdan tazartý boıynsha turǵyndar ótinishi azaıyp keledi», - dedi departament bastyǵy.
Sýdan tazartý jumystaryn osy aptanyń sońyna deıin aıaqtaý josparlanyp otyr. Oblys aýmaǵynda kún raıy da kúrt jylyna bastady.
Aıta keteıik, Túrkistan oblysynda úı men aýlalardy jańbyr sýynan tazartý jumystary naýryzdyń ortasynda bastalǵan bolatyn.
