Túrkistan oblysynda sý tasqyny qaýpi joq - TJD
TÚRKІSTAN. QazAqparat - Túrkistan oblysynda sý basý qaýpi joq. Turǵyndarǵa esh qaýip tónbeıdi. Bul týraly oblystyq TJD málimet taratty, dep habarlaıdy QazAqparat tilshisi.
Departamenttiń habarlaýynsha, oblysta sý basý qaýipi bar 64 nysan bolsa, onyń barlyǵy tıisti deńgeıde turaqty baqylaýǵa alynǵan. Óńirdegi sý qoımalary men ózenderdiń sý rejımine kúndelikti monıtorıng júrgizilýde. Sý qoımalarynyń ortasha tolýy 40-45 paıyzdy quraıdy. Tasqyn sýlardy qabyldaýǵa jetkilikti qorlar bar, al ózenderdegi sýdyń ótýi orta deńgeıden tómen. Sonymen qatar, aımaqtaǵy tasqyn qaýpi jaǵdaıyn anyqtaý maqsatynda taýdaǵy muzdyq kólderdiń jáne qar qorynyń jaǵdaıyna aerovızýaldy jáne jer ústi zerdeleý jumystary uıymdastyryldy. Zertteýler nátıjesinde bıyl ótken jylmen salystyrǵanda qardyń túsýi 13 paıyzǵa tómen ekeni anyqtalǵan.
Odan bólek, Tótenshe jaǵdaılar departamenti turǵyn úılerdiń órt qaýipsizdigin jáne turǵyndardyń ýly gazdan ýlanýdyń aldyn alý maqsatynda da birqatar jumystar atqarýda. Jyl basynan beri aptanyń ár senbisi oblys aýmaǵynda «Turǵyn úıde órt qaýipsizdigi» kúni bolyp belgilendi. Osy kúni departament garnızonynyń barlyq jeke quramy qala, aýyl, eldi mekenderdegi turǵyn úılerdi aralap ýly gazdan ýlanýdyń aldyn alý jáne órt qaýipsizdigin túsindirý jumystaryn júrgizýde.
«2018-2019 jylǵy jylytý maýsymy bastalǵaly mamandar 76 myńnan astam turǵyn úıdi aralap, 302 myńǵa jýyq adamǵa túsindirý jumystaryn júrgizgen. Sonymen qatar, buqaralyq aqparat quraldarynan arnaıy beınerolıkter kórsetilip, qaýipsizdik sharalary eskertilýde» delingen habarlamada.
