Túrkistan oblysynda sý sharýashylyǵynyń túıtkildi máseleleri talqylandy
TÚRKІSTAN. QazAqparat - Túrkistan oblysynda sý sharýashylyǵynyń túıtkildi máseleleri talqylandy. Ekologııa, geologııa jáne tabıǵı resýrstar vıtse-mınıstri Serik Qojanııazovtyń qatysýymen ótken selektorlyq jıynda sý únemdeý men tehnologııalardy qoldanatyn sharýalarǵa basymdyq berý jaıy sóz boldy, dep habarlaıdy QazAqparat tilshisi.
Jıynda oblystyq aýyl sharýashylyǵy basqarmasynyń basshysy Nurbek Badyraqov sý sharýashylyǵyndaǵy ózekti máseleler jaıynda baıandady.
Basqarma basshysy sýdy az qajet etetin ónim túrlerin arttyrý kózdelip otyrǵanyn atap ótti.
«Túrkistan oblysyn áleýmettik-ekonomıkalyq damytýdyń 2024 jylǵa deıingi keshendi jospary aıasynda iske asyrylyp jatqan jobalar Túrkistan oblysy úshin asa mańyzdy. Sondyqtan osy jobalarǵa respýblıkalyq bıýdjetten qarjy qarastyrýǵa yqpal etýińizdi suraımyn. Úkimettiń «2020-2030 jyldarǵa arnalǵan Sý resýrstaryn basqarý memlekettik baǵdarlamasyna» Túrkistan oblysy aýmaǵyndaǵy birneshe sý nysanyn kúrdeli jóndeý jumysynyń jobasy engen. Osy jobalarda aǵymdaǵy jylǵa kúrdeli jóndeý jumystaryna 17 nysanǵa qarjy qarastyrý maqsatynda 2021-2023 jyldarǵa arnalǵan respýblıkalyq bıýdjettik naqtylaýǵa bıýdjettik ótinim usynyldy. Jobalar iske asyrylǵan jaǵdaıda 20 267 ga jerde kepildi sýmen qamtamasyz etýge qol jetedi. Osyǵan oraı, aldaǵy respýblıkalyq bıýdjettiń naqtylaýynda qarjy qarastyrýǵa yqpal jasaýyńyzdy suraımyn», - dedi basqarma basshysy.
Nurbek Badyraqovtyń aıtýynsha, Túrkistan magıstraldy kanaly kúrdeli jóndeýden ótken.
Keńsaı-Qosqorǵan-2 sý qoımasynyń qurylysy júrip jatyr. Syrdarııa ózeninen mashınalyq ádispen Túrkistan magıstraldy kanalyna aǵyn sý tartý jobasy júzege asqan.
Oblystyq bıýdjet esebinen sońǵy 2 jylda 243 shaqyrymdy quraıtyn 61 kanalǵa jóndeý júrgizilip, 42 dana tik uńǵyma qalpyna keltirilgen.
Nátıjesinde 44,3 myń ga sýarmaly jerdiń sýmen qamtamasyz etilýi jaqsaryp, 53 mln tekshe metr sý únemdelgen.
«Turan sý» arnasyndaǵy 21 kanalǵa mehanıkalyq tazalaý jumystary júrgizilgen.
Arys-Túrkistan magıstraldy kanalynyń boıyndaǵy 97 ishki kanal oblystyq kommýnaldyq menshikke qabyldanyp, osy ishki kanaldarǵa shektik tarıf bekitilgen.
Sonymen qatar, «Arys-Túrkistan kanalyn qorektendiretin Syrdarııa ózeninen mashınalyq kanaldyń qurylysy» jobasy ázirlenýde.
Atalǵan jobalardyń Túrkistan oblysy úshin mańyzyn eskerip, qosymsha Syrdarııa ózeninen aǵyn sý lımıti suratylǵan bolatyn.
Bul máseleler ýaqyt kúttirmeıdi deıdi mamandar.
