Túrkistan oblysynda sport kesheni ashyldy
NUR-SULTAN. QazAqparat - 1 jeltoqsan – Tuńǵysh Prezıdent kúni merekesine oraı Túrkistan oblysy Tólebı aýdany Qasqasý aýyldyq okrýginde jeke kásipker, Pedagogıka ǵylymdarynyń doktory Mombek Qozybaqovtyń demeýshiligimen salynǵan sport kesheniniń saltanatty ashylý rásimi ótti.
Bul týraly Túrkistan oblysy óńirlik kommýnıkatsııalar qyzmeti habarlaıdy.
Jańa sporttyq-saýyqtyrý ortalyǵynyń lentasyn Memleket jáne qoǵam qaıratkeri, bokstan KSRO sport sheberi, Qazaqstanǵa eńbegi sińgen jattyqtyrýshy Amalbek Tshanov pen aýdan ákimi Baýyrjan Omarbekov qıdy.
Jańadan boı kótergen Jamalbek Qozybaqov atyndaǵy záýlim sport kesheninde turǵyndar boks, erkin kúres, grek-rım, fýtbol alańshasy, shahmat jáne doıby syndy sport túrlerimen shuǵyldana alady. Qurylysy 2018 jyly bastalǵan sporttyq nysannyń quny – 150 mln. teńge. Bir mezette 100-ge jýyq sportshy jattyǵa alatyn keshende barlyq jaǵdaı jasalǵan.
«Tuńǵysh Prezıdent kúnine tartý etilip otyrǵan osy áleýmettik mańyzy bar nysan buqaralyq sporttyń damýyna óz úlesin qosyp, talaı daryndy shákirtter men daraboz tarlandar túlep ushyp, egemendi elimizdiń kók baıraǵyn jeńis tuǵyryna kóterip, jelbiretedi dep senemin», – dedi aýdan ákimi Baýyrjan Omarbekov.
Mombek Qozybaqov zamanaýı úlgide salynǵan sport kesheniniń kiltin aýdandyq sport mektebine saltanatty túrde tabys etti.
