Túrkistan oblysynda Sozaq aýdanynyń 90 jyldyǵy toılanyp jatyr

TÚRKІSTAN. QazAqparat - Túrkistan oblysynda Sozaq aýdanynyń 90 jyldyǵyna oraı «Sozaq-jyr, Sozaq-sóz, Sozaq-óner» atty ǵylymı tájirıbelik konferentsııa ótti. Aıtýly jıynǵa qatysqan oblys ákimi Janseıit Túımebaev Sozaq óńiriniń qazaq tarıhyndaǵy róline toqtalyp, óńir turǵyndaryn aýdan mereıtoıymen quttyqtady, dep habarlaıdy QazAqparat tilshisi.

«Elbasymyz Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda «Týǵan jerdiń árbir saıy men qyrqasy, taýy men ózeni tarıhtan syr shertedi. Árbir jer ataýynyń tórkini týraly talaı-talaı ańyzdar men áńgimeler bar. Ár ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentter bar. Onyń bárin jas urpaq bilip ósýge tıis» dep atap kórsetken bolatyn. Túrkistan oblysynda da qasıetti jerler kóp. Sonyń biri de biregeıi, áýlıeli, kıeli, shertpe kúıdiń otany - Sozaq aýdany. Búgingi atap ótken mereıli toı - jańa jetistiktiń, teriskeıdegi tyń tabystardyń bastaýy bolsyn», - dedi Janseıit Qanseıituly.

Ǵylymı jıynda 1985-1991 jyldary Sozaq aýdandyq partııa komıtetiniń birinshi hatshysy qyzmetin atqarǵan Dosybaı Sherimqulov, Táýelsizdiktiń alǵashqy jyldarynda Sozaq aýdanynda tuńǵysh ákim bolyp qyzmet atqarǵan Á.Ombaev, 1994-1999 jyldary Sozaq aýdanyn basqarǵan Qýanysh Aıtahanov syndy azamattar quttyqtaý sózderin arnap, óńir tarıhynan syr shertti.