Túrkistan oblysynda shopan qojaıynnyń 1000 qoıyn satyp jibergen
NUR-SULTAN. QazAqparat – Túrkistan oblysynda shopan qojaıynnyń myń bas qoıyn satyp jibergen, dep habarlaıdy oblystyq PD baspasóz qyzmeti.
Otyrar aýdandyq PB kezekshi bólimine jergilikti turǵyn habarlasyp, onyń myń bas qoıynyń joǵalǵany týraly aryzdanǵan. Jábirlenýshiniń aıtýynsha bul qylmysqa, maldarynyń joǵalýyna malyn senip tapsyrǵan, ıaǵnı baqqan qoıshynyń qatysy bolýy múmkin. Jábirlenýshige keltirilgen shyǵynnyń jalpy kólemi 53 mıllıon teńgeden asty.
Otyrar APB-niń polıtseıleri jedel-izdestirý is-sharalary barysynda kúdiktiniń izine túsip, ony Nur-Sultan qalasynda ustady. Jedel ýákilder jasyrynǵan shopandy polıtsııa bólimine jetkizdi. Ol óz áreketin tolyq moıyndady.
Tergeý barysynda kúdikti eki jyl ishinde jábirlenýshiniń 1060 qoıyn bólip satqany, al aqshasyn óz qajettilikterine jumsaǵany anyqtaldy. Búginde tártip saqshylary urlanǵan 30-ǵa jýyq qoıdy zańdy ıesine qaıtardy.
Atalǵan jaıt QR QK-niń 189-baby «Senip tapsyrylǵan bótenniń múlkin ıemdený nemese ysyrap etý» boıynsha tirkelip, sotqa deıingi tergeý amaldary júrgizilýde. Kúdikti qamaýda. Qazirgi ýaqytta oqıǵanyń barlyq mán-jaılary anyqtalýda.
