Túrkistan oblysynda shokolad óndiretin tseh iske qosyldy
TÚRKІSTAN. QazAqparat - Búgin Túrkistan oblysyna qarasty Tólebı aýdanynda birqatar nysandar ıgiligine berildi. Oblys ákimi Janseıit Túımebaev bastaǵan top, eń aldymen, ondaǵy Birinshi Mamyr aýylynan ashylǵan «Balmuzdaq» JShS-niń shokoladty glazýr jáne shokolad óndeıtin tsehynda boldy, dep habarlaıdy QazAqparat.
Joba quny - 800 mln teńge. Kásiporynda jylyna 1100 tonna shokoladty glazýr men shokolad ónimderi óndiriledi dep kútilýde.
Negizinen, «Balmuzdaq» JShS 2017 jyly quny 2,5 mlrd teńge bolatyn 3200 tonna balmuzdaq ónimderin óndirgen. Al byltyr Ózbekstanǵa 6,1 mln teńgege 8700 kg balmuzdaq eksporttady. Kásiporyn búgingi kúni balmuzdaqtyń 80-nen astam túrin shyǵarady. Kásiporyn quny 220 mln teńge turatyn balmuzdaq óndiretin qazirgi zamanǵy qural-jabdyqpen jabdyqtalǵan.
«Balmuzdaq» JShS-niń ónimderi tek qana Túrkistan oblysynda ǵana emes, respýblıkamyzdyń soltústiginde, Almaty, Astana, Aqtaý, Taraz qalalarynda da úlken suranysqa ıe.
Óndiris ornynyń jumysymen jiti tanysqan oblys ákimi kásipkerdiń isine sáttilik tilep, otandyq ónimdi óndirip, el turǵyndaryn sapaly ónimmen qamtýda aıanbaı eńbek ete berýine tilektestik bildirdi. Sondaı-aq, shaǵyn jáne orta kásip ıelerine memleket tarapynan qashanda tıisti qoldaý bolatynyn taǵy bir eske salyp, azamattyń isi kópke úlgi bolýy kerektigin aıtty.
Óz kezeginde, oblys basshysy zaýyt jetekshiligine jańadan qurylǵan Túrkistan oblysynyń atyn shyǵaryp, jer-jahanǵa tanytý úshin «Túrkistan» brendimen shokolad túrin shyǵarýdy usyndy. Osynaý usynysty qoldaǵan kəsiporyn ujymy tez arada atalǵan ıdeıany júzege asyrýdy qolǵa alatynyn jetkizdi.
Búginde Tólebı aýdanyndaǵy kásipkerlik sýbektileriniń sany 8 211 bolsa, onyń 7594-i - belsendi jumys istep júrgen azamattar. Sonyń arqasynda mundaǵy ónerkásip salasynda byltyr jalpy 32 mlrd 166,2 mln teńgeniń ónimi óndirilip, 2017 jylmen salystyrǵanda 27,3 paıyzǵa artty. Kishi jáne orta bıznesti damytý úshin aýdan boıynsha jalpy qarjylandyrý kózderinen 12 238 azamatqa 6 mlrd 727 mln teńgege nesıe berilip, 2017 jylmen salystyrǵanda 18 paıyzǵa kóbeıgen.
