Túrkistan oblysynda shirkeıdiń kóbeıýine Kóksaraı sý rettegishiniń qatysy joq - ǵalym
Túrkistan oblysyndaǵy Otyrar, Shardara aýdandary men Arys qalasynyń aýmaǵynda shirkeı qaptap ketti. Turǵyndar betterin búrkep, kózildirik kıip júrýge májbúr. Sebebi, shirkeıden tek solaı ǵana qorǵana alady. Al, shirkeıge talanǵan qustardyń balapandary men tórt túliktiń tólderi ólip ketip jatyr.
«Kóksaraı» sý rettegishi salynǵaly beri óńirde shirkeı qaptap ketti». Áleýmettik jelide taraǵan vıdeolarǵa pikir bildirýshiler osyndaı oı jazǵan. Al, bıologııa ǵylymdarynyń kandıdaty Qarshyǵa Kóshkimbaev «Shirkeıdiń «Kóksaraı» sý rettegishine eshqandaı qatysy joq» degen paıym aıtty.
«Shirkeı Syrdyń boıynda burynnan bar. Biraq, mundaı kóp emes edi. Shirkeı tek aǵyn sýda bolady. Sondyqtan, «Kóksaraı» sý rettegishiniń bul tabıǵı protseske eshqandaı qatysy joq. Jalpy, Syrdarııa ózeniniń aǵysy buzylǵandyqtan, aýa ózgeriske ushyraǵan. Bul sodan týyndaǵan bolǵan tabıǵı protsess bolýy múmkin», - deıdi ol.
Al, zalalsyzdandyrý jumystaryn júrgizip jatqan merdiger mekeme dırektorynyń orynbasary Qaırat Ermen bir apta ishinde shirkeımen kúrestiń nátıjesi kórine bastaıtyndyǵyn málimdedi.
Jalpy, óńirdegi tórt aýdan men eki qalada shirkeımen kúreske bıýdjetten 643 mln teńge bólinip otyr. Bul qarjyǵa Syrdarııa ózeni boıynda jáne Shardara, Otyrar, Saýran aýdany men Arys, Túrkistan, Kentaý qalasynda zalasyzdandyrý jumystary júrgiziledi.
