Túrkistan oblysynda sheteldikterdi zańsyz jumysqa tartqan 182 adam ákimshilik jazalandy
Jyl basynan beri Túrkistan oblysynyń aýmaǵynda «Halyqtyń kóshi-qony týraly» Zańynyń talaptaryn óreskel buzýǵa jol bergen 3640 sheteldik pen Qazaqstan Respýblıkasynyń azamattary anyqtalyp, ákimshilik jaýapkershilikke tartyldy.
Olardyń ishinde Túrkistan oblysyna kelip, zańsyz jumys istegen 1575 shetel azamaty bar. Olar QR ÁQBtK-niń 517-baby 5-bóligi «Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy» boıynsha jaýapqa tartylǵan. Al, sot sheshimimen 457 shetel azamaty el aýmaǵynan shyǵaryldy.
Sonymen qatar sheteldikterdiń kelýi týraly ýaqtyly habarlamaǵan qabyldaýshy tarap boıynsha 913 azamatqa qatysty QR ÁQBtK-niń 518-baby «Sheteldikterdi jáne azamattyǵy joq adamdardy qabyldaıtyn jeke nemese zańdy tulǵalardyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy» boıynsha ákimshilik sharalar qabyldanǵan.
Al, sheteldik jumys kúshin zańsyz jumysqa tartqany úshin 182 adam QR ÁQBtK 519-baby «Sheteldik jumys kúshin jáne eńbekshi kóship kelýshilerdi Qazaqstan Respýblıkasynyń zańnamasyn buza otyryp tartý» boıynsha ákimshilik jaýapkershilikke tartyldy.
