Túrkistan oblysynda sheteldik avtokólikterge sary nómir berile bastady
TÚRKІSTAN. QazAqparat – Túrkistan oblysy, Saıram aýdanynyń mamandandyrylǵan halyqqa qyzmet kórsetý ortalyǵynda avtokólik ıeleri alǵash ret Eýrazııalyq ekonomıkalyq odaq elderinen ákelingen avtokólikterin ýaqytsha tirkeýden ótkizdi, dep habarlaıdy QazAqparat tilshisi.
Elimizde aǵymdaǵy jyldyń 1-shi aqpanynan bastap Eýrazııalyq ekonomıkalyq odaq elderinde esepte turǵan sheteldik nómirleri bar avtokólikterdi tirkeý aktsııasy bastaldy.
Polıtseıler atap ótkendeı, nómirlerdi rásimdeýge 20 mınýt qana ýaqyt ketedi. Jańa tirkeý nómirlerin alǵan avtokólik ıeleri endi Qazaqstannyń barlyq aýmaǵynda jyl boıyna emin-erkin júrýine bolady. Alaıda, sodan keıin olar turaqty tirkeý máselesin sheshýi kerek. Máselen, aýdandyq «avtotsonda» jergilikti turǵyn Sergeı Shvedov Toıota Lend Krýzer men Toıota Kamrı markaly avtokólikterine «sary nómir» rásimdedi. Taǵy bir avtokólik ıesi Erdos Shyntóre de Djıp Grand Cherokı avtokóligine ýaqytsha tirkeý nómirin aldy.
Túrkistan oblystyq PD Ákimshilik polıtsııa basqarmasynyń bastyǵy Almashan Tastanbekovtyń aıtýynsha, búginde EEO elderinen ákelingen avtokólikterdi rásimdeý erejeleri týraly keńes alý úshin 250-den astam avtokólik ıesi polıtsııaǵa júgingen. Budan bólek osyndaı túsindirý jumystary turaqty túrde júrgizilýde. Onyń ishinde «Jolda qabyldaý» aktsııasy aıasynda múddeli organdarmen birlesip, sheteldik memlekettik nómirli kólikterdi rásimdeý qajettiligi týraly jumystar atqarylýda. Bul baǵyttaǵy ister aldaǵy ýaqytta da óz jalǵasyn tabady,- deıdi polıtseıler.
