Túrkistan oblysynda sheneýnikter jańadan bosanǵan analardy merekemen quttyqtady
TÚRKІSTAN. QazAqparat – Túrkistan oblysy ákiminiń orynbasary Arman Sábıtov pen Qoǵamdyq densaýlyq basqarmasynyń basshysy Marat Pashımov №1 oblystyq perınataldyq ortalyǵynda bolyp, jas analardy mereıli merekesimen quttyqtady.
Ómirge sábı ákelgen názik jandarǵa jyly lebizin bildirip, tartý-taralǵy jasady, dep habarlaıdy QazAqparat tilshisi.
«Ana – ómirdiń gúli, tirshiliktiń nury, meıirim men izgiliktiń jarshysy. Áıel - bútin bir shańyraqtyń shamshyraǵy. Endeshe mereıli merekede Sizderge tek shattyq pen qýanysh tileımin. Árdaıym aqpeıil de qamqor, adal da, úlgili qalyptaryńyzdan aınymaı júre berińizder», - dedi oblys ákiminiń orynbasary.
Túrkistandyq sheneýnikter sondaı-aq, ýaqytpen sanaspaı ári mereke kúni jumysta júrgenderge de izgi tilekterin jetkizdi.
Aıta keteıik, atalǵan ortalyqta 656 maman jumys isteıdi. Olardyń basym bóligi názik jandar. ıAǵnı, 609 qyz-kelinshektiń arasynda dárigerler men medıtsına ǵylymdarynyń kandıdattary jáne densaýlyq saqtaý salasynyń úzdikteri bar.
«Sizder mereke kúnderinde de jumys istep, balaly bolǵan otbasylardyń qýanyshyna sebepkersizder. Shyn júrekten qoldaý kórsetkenderińiz úshin jáne naýqastarǵa kún saıyn kórsetetin qajyrly qyzmetterińiz úshin alǵysym sheksiz», - dedi oblystyq Qoǵamdyq densaýlyq basqarmasynyń basshysy.
Jalpy, Túrkistan oblysy bala týý boıynsha elimizde kósh bastap tur. Jyl basynan beri oblysta 10 myńnan astam sábı dúnıege kelgen. Al, oblystyq perınataldyq ortalyǵynda dúnıe esigin ashqan 1571 balanyń 38-i egiz bolsa, bireýi úshem.
