Túrkistan oblysynda shen taǵyp, forma kıgen kópbalaly analar kóp

TÚRKІSTAN. QazAqparat – Qoǵamda temirdeı tártipke baǵynyp, erlermen ıyq tirese eńbek etip júrgen názik jandy arýlar kóp. Qıyn qyzmetti kúni-túni atqaryp júrgen áıelder qaýymy qoǵamdyq tynyshtyqty saqtaýda ózindik qoltańbasyn qaldyryp keledi.

Otyrarlyq Aınur Tóleýovanyń ishki ister salasynda eńbek etip kele jatqanyna 10 jyldan astam ýaqyt bolǵan.

Osy jyldar ishinde óziniń jumysqa degen joǵary jaýapkershiligin kórsetip, bilikti de, bilimdi maman ekendigin dáleldedi.

Aınur eńbek jolyn 2003 jyly Otyrar APB «baǵdarlamashy» bolyp bastaǵan. Keıinnen áıelderdi zorlyq zombylyqtan qorǵaý tobynyń ınspektory qyzmetin atqardy.

Al, qazir shtab tobynda aǵa ınspektor. Bilikti maman mınıstrlik tarapynan kelgen nusqaýlar men sheshimderdiń oryndalýyn baqylap otyrady.

- Mamandyǵymdy jaqsy kóremin. Tańerteń turǵannan jumysqa kelýge asyǵyp turamyz. Mundaǵy ujym da óz úıimdeı bolyp ketken. Bir otbasynyń balalaryndaı ǵumyr keship jatyrmyz. Al, jumystan soń otbasymyzǵa asyǵyp turamyz. Osyndaı deńgeıge jetkizgen áke-sheshemizge, ata-enemizge rahmet aıtamyn – deıdi ol.

Aınur Tóleýova - kópbalaly ana. Joldasy Arman órt sóndirý salasynda qyzmet atqarady. Ekeýi qazirgi tańda úsh ul, eki qyz tárbıelep otyr.

Balalary da shen taqqan ata-anasyn úlgi tutady. Anasy da bos ýaqytyn bala tárbıesine arnaıdy.

Tálim tárbıe berip, sabaq oqytady. Dombyra úıretip, ulttyq ónerge baýlıdy.

Kelese aýdandyq polıtsııa bóliminde kúmis alqa ıegeri qyzmet etip júr.

Kóshi-qon qyzmet tobynyń aǵa ınspektory, polıtsııa maıory Gúljan Quralbekova ári bala tárbıesimen, ári úı sharýashylyǵyna da uqypty. Barlyǵyna úlgeredi.

Joldasy men ul-qyzdary da shendi arýdyń qyzmetine qurmetpen qaraıdy.

«Saryaǵash qalasynda qyzmet ettim, keıinnen Keles aýdanyna aýystym. Qazirgi tańda maıor shenin aldym, ári 2 ul, tórt qyz ósirip otyrǵandyqtan kúmis alqa ıegeri atandym» -deıdi ol.

Túrkistan qalalyq polıtsııa basqarmasynda aqparattandyrý jáne baılanys tobynyń aǵa ınspektory bolyp qyzmet atqaratyn Gúlbaný Batyrova da - kópbalaly ana.

Gúlbanýdyń ómirlik serigi Ǵazız - zań salasynyń mamany. Shen taqqan jup Danııal, Qaısar, Erkenaz, Sabına atty ul-qyzdardy tárbıelep otyr.

«Jan-jarymnyń anasy - meniń de anam, sol úshin ol kisige jasaǵan jaqsylyǵymyzdy balalarymyz kórip, erteńgi kúni olar da otbasynan alǵan tálim-tárbıeni boıyna sińirip ósedi. Sondyqtan birinshi kezekte kúıeýim ekeýmiz ul-qyzdarymyzǵa úlgi bolýymyz kerek dep esepteımin», - deıdi ol.