Túrkistan oblysynda shegirtkege qarsy kúres bastaldy
TÚRKІSTAN. QazAqparat - Túrkistan oblysynda shegirtkelerge qarsy kúres sharalary bastaldy.
Bul týraly Óńirlik kommýnıkatsııalar qyzmetinde ótken brıfıngte QR Aýyl sharýashylyǵy mınıstrliginiń Agroónerkásiptik memlekettik ınspektsııa komıtetiniń Túrkistan oblystyq aýmaqtyq ınspektsııasynyń basshysy Nurjan Quttybekuly málimdedi, dep habarlaıdy QazAqparat tilshisi.
Aýmaqtyq ınspektsııa basshysynyń sózinshe, bıyl óńirde zııankesterge qarsy hımııalyq dárileý jumystary 83 myńnan astam gektar jerge júrgiziledi dep josparlanyp otyr.
«Oblystyq aýmaqtyq ınspektsııa tarapynan marokko shegirtkesine qarsy óńdeý jumystarynyń sapaly júrgizilýin baqylaý, aýdandar boıynsha hımııalyq óńdeý júrgizý maqsatynda 15 top qurylyp, 33 ınspektor jáne 17 avtokólik bólindi. Sonymen qatar, 83 myńnan astam gektar jerge hımııalyq óńdeý jumystaryn júrgizý úshin 1189,8 myń gektar alqapta anyqtaý-zertteý jumystaryn júrgizý josparlanyp otyr. Oǵan «Respýblıkalyq fıtosanıtarlyq dıagnostıka jáne boljamdar ádistemelik ortalyǵy» RMM Túrkistan oblystyq fılıalynan 90 shtattaǵy maman men anyqtaýshy jáne 44 qyzmettik avtokólik bólindi. Aýdan ákimdikteri tarapynan qosymsha 185 qyzmetker jumyldyrylyp, 47 jumys toby quryldy. Sondaı-aq 28 sý tasýshy tehnıka men pestıtsıdterdi eritýge qajetti 73 sý kózi daıyndalady», - dedi Nurjan Kashkenov.
Búl baǵyttaǵy jumystar oblys ákiminiń asa qaýipti zııankestermen kúres baǵytyndaǵy tapsyrmalaryn oryndaý úshin uıymdastyrylýda. Osy maqsatta úılestirý jumystaryn júrgizetin arnaıy shtab qurylyp, shegirtke taraǵan aýdandarda tıisti jumystar atqarylyp jatyr.
Aıta keteıik, atalǵan mindetterdi talapqa saı oryndaý úshin jergilikti atqarýshy organdarmen birlesken jumys jospary jasalyp, naqty ister qolǵa alynǵan. Osyǵan baılanysty bıyl oblys dıqandary shegirtkeden zardap shekpeıdi degen senim bar.
