Túrkistan oblysynda sharýalarǵa janarmaı tasymaldaý máselesi talqylandy
ShARDARA. QazAqparat – Túrkistan oblysy, Shardara aýdanynda sharýalarǵa janarmaı tasymaldaý máselesi talqylandy. Aýdan ákiminiń orynbasary A.Tájenov pen aýyl sharýashylyǵy bólimniń basshysy T.Álimqulov sharýalarǵa janarmaı tasmaldaýshy «KazRosNeft» jáne «Simyrg Trans Oil» JShS ókilderimen kezdesti, dep habarlaıdy QazAqparat tilshisi.
Kezdesý barysynda sharýa qojalyqtarǵa janarmaı jetkizý jaıy qozǵalyp, janarmaı qorynyń kólemi men onyń baǵasy talqylandy. Atalmysh operatorlar óz qoımalarynda aýdandaǵy sharýalar men fermerlerge qajetti jaǵarmaı qory tolyqtaı jetetindigin aıtty. Sondaı-aq, janarmaıdy bastapqy bosatý ortalyǵynan 160 teńge, al jetkizip tasymaldaý túri boıynsha 163 teńgege satyp jatqanyn atap ótti. Sonymen qatar, bıylǵy jyly álemdik tótenshe jaǵdaıǵa baılanysty dızeldik otynǵa suranystyń tómendegenin de jasyrmady.
«Bizge arzandatylǵan janarmaı kóleminiń bosatylyp, tıisti oryndarǵa jetkizilgeni tıimdi. Qazir usaq sharýa qojalyqtar az kólemde ǵana janarmaı alyp, al tonnalaǵan janarmaı qoımalarymyzda uzaq saqtalyp qalýda. Bul bizge shyǵyn keltirip otyr. Sondyqtan, úlkendi-kishili sharýa qojalyqtaryna memleket tarapynan jeńildetilgen janarmaı kólemin alýǵa asyǵyńyzdar degen bolar edik. Biz aýdandaǵy sharýa qojalyqtaryna qansha janarmaı qajet bolsa, sonsha kólemde bosatyp ári jetkizip bere alamyz»,-dedi janarmaı tasymaldaýshy operatorlar.
Óz kezeginde aýdan ákiminiń orynbasary A.Tájenov jergilikti sharýa qojalyqtaryna arzandatylǵan janarmaı qorynyń bar ekeni jóninde habarlanatynyn jetkizdi. Bul baǵytta salaǵa jaýapty bólim mamandaryna aýqymdy jumystar atqarý jóninde tapsyrma berdi.
