Túrkistan oblysynda sharýalarǵa karantınde qoldaý kórsetý úshin 80 mlrd teńge bólinbek
TÚRKІSTAN. QazAqparat – Túrkistan oblysyndaǵy sharýalarǵa karantın kezinde qoldaý kórsetý úshin 80 mlrd teńge kóleminde qarajat qarastyrylǵan.
Búgin bul týraly Óńirlik kommýnıkatsııalar qyzmetinde ótken brıfıngte oblystyq kásipkerlik jáne saýda basqarmasynyń basshysy Nurbaqyt Imanqulov málimdedi, dep habarlaıdy QazAqparat tilshisi.
Basqarma basshysynyń sózinshe, óńirde kásipkerlikti qoldaý arqyly ekonomıkany turaqtandyrý sharalary negizinen úsh baǵytta júrgizilýde. Atap aıtqanda, jeńildetilgen qarjylandyrý, salyqtyq jeńildikter, nesıelik yntalandyrý túrindegi qoldaýlar.
«Kásipkerlik sýbektileri úshin qarjylandyrý qoljetimdiligin arttyrý maqsatynda «Qarapaıym zattar ekonomıkasy» baǵdarlamasy boıynsha qarjylandyrý kólemi Respýblıka boıynsha 1 trln. teńgege deıin ulǵaıtyldy. Búgingi tańda Túrkistan oblysy baǵdarlamany júzege asyrý boıynsha respýblıkada kóshmbastap tur. Máselen, baǵdarlama sheńberinde 50 mlrd. teńgeni quraıtyn 446 áleýetti joba bar. Onyń ishinde 27,8 mlrd teńgeni quraıtyn 274 joba qarjy ınstıtýttary tarapynan maquldanyp, qarjylandyrylýda», – dedi N.Imanqulov.
Sondaı-aq, sala basshylyǵy kásipkerlerdiń óndiristik qýatyn saqtaý jáne turaqtandyrýǵa baǵyttalǵan «Bıznestiń jol kartasy 2025» memlekettik baǵdarlamasyna birqatar ózgeris engizilip, bıznes úshin Baǵdarlamaǵa qatysý maksımaldy túrde ońtaılandyrylatynyn jetkizdi. Nesıe somasy da 2,5 mlrd teńgeden 7 mlrd teńgege deıin ulǵaıtylyp, salalyq shekteýler alyndy, kepildik beriletin nesıe somasy 1 mlrd teńgege deıin óskenin aıtady.
Paıyzdyq stavkasy 6% kóleminde bekitilgen. Júıeli jumystardyń nátıjesinde óńirdegi baǵdarlamanyń bıýdjeti eki esege ósip, 4,8 mlrd teńgege jetken. Qarajat sheńberinde 500-den astam kásiporynǵa qoldaý kórsetilmek.
Odan bólek, bıyl sharýalar «Eńbek» baǵdarlamasy, «Ońtústik» aımaqtyq ınvestıtsııalyq ortalyq» jáne «Yrys» mıkroqarjy uıymy» qarjy ınstıtýtary, Agroónerkásip keshenin damytý baǵdarlamalary arqyly bıznesti qoldaý maqsatynda 80 mlrd. teńgege jýyq qarajat qaralǵan. Qarjylaı qoldaýlardyń nátıjesinde jyl sońyna deıin 50 myńǵa jýyq kásipkerlik, otandyq taýar óndirýshiler jáne sharýa qojalyqtary qarjylaı qoldaýlarmen qamtylady dep josparlanyp otyr. Jalpy, ekonomıkany turaqtandyrý shalaryna jeke kásipkerlik sýbektilerin jappaı qatystyrý basty nazarǵa alynǵan.
