Túrkistan oblysynda sharýalar egis alqabyna jańa tehnologııalardy paıdalanýda
TÚRKІSTAN. QazAqparat – Túrkistan oblysynyń Keles aýdanynda sharýalar egis alqabyna ǵylymı júıeni engize bastady. Bul óz kezeginde ónim kólemin arttyryp, shyǵyndardy azaıta túspek. Birlesý aýylynda uıymdastyrylǵan arnaıy semınarda ǵylymǵa negizdelgen jumys júıesi sharýalarǵa keń kólemde túsindirildi, dep habarlaıdy QazAqparat tilshisi.
«Aýyl sharýshylyǵyn mehanıkalandyrý jáne avtomattandyrý» ǵylymı ortalyǵynda ótken semınarǵa aýdan ákimi Aqmentaı Esbaev pen aýyldyq okrýgterdiń ákimderi, sharýalar men dıhandar qatysty. Basqosýda ǵalymdar men sala mamandary jańa tehnologııalardy egistik alqaptarynda qoldaný jaıyn jan-jaqty talqylady.
Semınarda atalǵan ortalyqtyń ókili Berdııar Qalymbetov ǵylymı jobanyń tájirıbesimen bólisti. Onda zamanaýı tehnologııanyń kúshimen egin egip, jylyna úsh ret ónim alýǵa bolatyndyǵy túsindirildi.
«Aýdan boıynsha 29 jobaǵa atalǵan tájirıbe qoldanylýda. Búginde bul sharýalarmen tyǵyz baılanys jasaýdamyz. Bolashaqta Keles aýdanynyń jeri qunarlyǵyn eskerip, egin sharýshylyǵyn zamanaýı tehnologııa kómegimen alýdy josparlap otyrmyz», - dedi Berdııar Qalymbetov.
Jıyn barysynda aýdan ákimi Aqmentaı Esbaev ǵalymǵa aýdan aýmaǵynda MTZ ortalyǵyn ashýdy usyndy. Ol úshin aýdan ákimdigi tarapynan qoldaý kórsetiletindigin jetkizdi. Sharýalarda ǵylymǵa negizdelgen júıeni qoldaıtyndyǵyn bildirdi.
