Túrkistan oblysynda sharýalar aǵyn sýdan taryǵyp otyr
TÚRKІSTAN. QazAqparat- Túrkistan oblysynda dıqandar aǵyn sýdyń tapshylyǵynan kóktemgi dala jumystaryn bastaı almaı otyr.
Shardara aýdanynyń sharýalary jergilikti kanaldardy jóndeý jumystary birneshe aıǵa sozylǵandyqtan, egistikke sý kelmeı qalǵanyn aıtady, dep habarlaıdy QazAqparat tilshisi.
Dıqandardyń sózinshe, sý tapshylyǵy máselesi bıyl da qaıtalanyp otyr. Kanaldardy jóndeý jumystarynyń kesheýildeýinen egistikke sý barmaı, sharýalar egin ege almaı qalǵan.
«Kanaldardy jóndep jatqan merdiger mekemelerdiń tehnıkalary ýaqytyly kelmeı qalady ne bolmasa betony bolmaı qalady. Sóıtip sý berilmeıdi. Bıyl maqtany egýge keshigip jatyrmyz. Osylaı jalǵasa beretin bolsa, merziminde ege almaı qalýymyz da múmkin»,- deıdi Alataý aýylynyń turǵyny Seısen Qýan.
Máselen. atalǵan aýdandaǵy Qyzylqum men Qazaqstan aýyldarynyń dıqandary «Qyzylqum» kanalyn jóndep jatqandarǵa ókpesi qara qazandaı. Olardyń jumysty sozbalańǵa salýynan aǵyn sý kelmeı, qınalyp qalǵan.
«Biz osy ýaqytta maqta egýimiz kerek edi. Men ózim 46 mln teńge nesıe aldym. Sılıtra, amafos daıyn bizde. Biraq bular sýdy naýryzdyń ony kúnderi berýi kerek edi, bermedi. Maqta egýdi merziminen keshiktirip otyrmyz endi, erteń bankrot bolýymyz múmkin. Jumys múlde júrip jatqan joq. Qatty qınalyp jatyrmyz. Onyń ústine osy «Kóksaraı» sý rettegishin salǵan bes jyldan beri jerler sorlanyp, paıdaǵa jaramaı jatyr», - deıdi «Qazaqstan» sharýa qojalyǵynyń tóraǵasy Dmıtrıı Anafıdın.
Mundaı qıyndyqtar Maqtaaral aýdanynda da kezdesedi. Myrzashóldiń dıqandary keı jerlerde kanaldardy betondaý jumystarynyń saldarynan aryqtarǵa topyraq tolyp, sý barmaı qalǵan. Keı jerlerde sý sorǵysh qondyrǵylar tapshylyǵynan dıqandar sýdan taryǵyp, kúnkóristen qaǵyldyq deıdi.
«Osy jerde 150-den asa sharýa qojalyǵy bar, bárine sý jetpeıdi. Qysta da, jazda da jetpeıdi bizge»,- deıdi jergilikti sharýalar.
Bul máselege oraı elimizdiń Ekologııa, geologııa jáne tabıǵı resýrstar mınıstri Maǵzum Myrzaǵalıev aǵyn sý egistikke jetkenshe 40 paıyzyn joǵaltatynyn aıtady. Sondyqtan jappaı kanaldardy betondaý jumystary júrgizilýde.
«Jumystardy atqarý barysynda kesteden keshigý bar. Sondyqtan 15-shi sáýirge deıin barlyq josparlanǵan jumystardy atqaratyn bolamyz»,- dedi sharýalarmen kezdesken mınıstr.
Vedomstvo basshysy sondaı-aq, bıylǵy jyly elde aǵyn sý tapshylyǵy bolatynyn jetkizdi. Sebebi, kórshi memleketterde de osyndaı boljam jasalǵan. Qazaqstan boıynsha 30-ǵa tarta sý qoımalary jóndeýdi qajet etetinin aıtady.
