Túrkistan oblysynda «Shardara Armsport» klýbynyń jattyǵý alańshalary ashyldy

Saltanatty sharaǵa Shardara aýdanynyń ákimi Qaırat Joldybaı men Túrkistan oblystyq dene shynyqtyrý jáne sport basqarmasynyń basshysy Polat Qyryqbaev qatysty, dep habarlaıdy QazAqparat tilshisi.

Sportshylary elimizdiń namysyn álemde qorǵap, kóptegen jetistikterge jetip júrgen klýbtyń alańynda «Bizdiń maqsat - Olımpıada» atty eskertkish ashyldy. Sondaı-aq, vorkoýt, fýtbol men jazǵy jattyǵý alańshalary paıdalanýǵa berildi. Nysandardyń ashylý saltanaty barysynda alǵashqy quttyqtaý sóz sóılegen aýdan ákimi Qaırat Joldybaı klýbtaǵy sportshylardyń jetistikterin maqtanyshpen aıta otyryp, aldaǵy ýaqytta olardyń Olımpıada shyńyn baǵyndyra berýlerine tilektestik bildirdi. Al, oblystyq dene shynyqtyrý jáne sport basqarmasynyń basshysy Polat Qyryqbaev Shardara aýdanynda sporttyń óte qarqyndy damý ústinde ekenin tilge tıek etip, bıylǵy jyly respýblıkalyq jarystar uıymdastyrylyp jatqanyn atap ótti. Sondaı-aq, álem chempıondaryn jattyqtyryp júrgen oblystyq N4 ORMBJSM dırektory Arman Qarsybaevqa erekshe alǵysyn jetkizdi.

Aıta keteıik, Shardara aýdany armrestlıng sportynan 34 álem chempıony, 39 álem chempıonatynyń júldegeri, 114 Azııanyń jeńimpazy, 252 Qazaqstannyń chemıondary shyqqan. Búginde qol kúresten elimizdegi ulttyq quramanyń 80 paıyzyn shardaralyq sportshylar quraıdy. Atalǵan jetistikke jetýde, «Shardara Armsport» klýbynyń negizin qalaýshy, Túrkistan oblystyq №4 Olımpıada rezerviniń mamandandyrylǵan balalar men jasóspirimder sport mektebiniń dırektory Arman Qarsybaevtyń eńbegi orasan. Ol -2005 jyly Japonııa elinde álem chemıony bolǵan. Sol kezeńnen bastap, shardaralyq jigitter elimizdiń namysyn álemdik dodalarda qorǵap keledi.

Arman Romanulynyń bastamasymen sport mektebinde sadaq atý, kúres, boks, aýyr jáne jeńil atletıka baǵyttary da qolǵa alynyp otyr.