Túrkistan oblysynda sapasyz tóselgen jol qaıta jóndeýden ótedi
Áleýmettik jelide «Jyzzaq-Gagarın-Jetisaı-Qyzylásker-Abaı-Saryaǵash-Jibek joly» A-15 avtojolynyń sapasyz jóndelgendigi jaıynda vıdeo tarady. Onda turǵyndar merdigerge jumysty sapaly atqarý kerektigi jaıynda talap qoıǵanyn kórýge bolady.
Keıinnen jergilikti turǵyndarmen kezdesken Jetisaı aýdanynyń ákimi Serik Mamytov joldyń Jańa aýyl aýyldyq okrýgindegi bóliginde merdiger tarapynan kemshilikter jiberilgendigin málimdedi. ıAǵnı, tóselgen asfalttyń qalyńdyǵy men eni talaptarǵa sáıkes kelmegen.
«Aldaǵy ýaqytta «QazAvtoJol» UK» AQ Túrkistan oblystyq fılıaly 47 shaqyrymdy quraıtyn A-15 avtojolynyń Ózbekstan Respýblıkasynyń shekarasynan Jetisaı qalasyna deıingi aralyǵyndaǵy joldy qaıta jóndeýden ótkizedi. Atap aıtqanda, asfalttyń ústińgi qabaty frezerlenip, qalyńdyǵy 5 sm, eni 6 metrdi quraıtyn asfalt-beton tóseledi. Asfalt-betonnyń qalyńdyǵyn tekserý úshin «Jol aktıvteriniń ulttyq sapa ortalyǵy» ShJQ respýblıkalyq memlekettik kásiporny Túrkistan fılıalynyń zerthanasy jumyldyrylady»,-dedi Serik Mamytov.
