Túrkistan oblysynda «Samǵaý-2018» kınofestıvaliniń úzdikteri anyqtaldy

TÚRKІSTAN. QazAqparat - Túrkistan oblysynyń «Jastar resýrstyq ortalyǵy» uıymdastyrǵan jas rejısserlerdiń dástúrli «SAMǴAÝ-2018» qysqametrajdy beınefılmder baıqaýy óz máresine jetti. Astana qalasynyń 20 jyldyq mereıtoıyna arnalǵan baıqaýǵa  40-tan astam fılm usynylyp, onyń ishinen 20 fılm iriktep alyndy, dep habarlaıdy QazAqparat tilshisi.

Baıqaýǵa qatysýshylar erkin taqyrypta 5-15 mınýt aralyǵynda túsirilgen beınefılmderin usyndy. Olardyń arasynda «Illıýzııa», «CEITNOT», «Meıirim ańsaǵandar», «Instınkt», «Balyq sorpa», «105», «Anama», «Qaraótkel», «Otaý», «STOP», «Árkim ózin oılaıdy», «Dos» jáne taǵy sol sekildi beınefılmder bar.

Jas rejısserlerdiń sheberligi men kásibıligin belgili operatorlar men klıpmeıkerler, teatr akterleri men blogerler, kompozıtorlar men rejısserler baǵalady. Nátıjesinde ІІІ-oryndy «STOP»  beınefılminiń rejısseri Hamıt Mýtalıev ıelense, ІІ-oryndy «Dos» beınefılminiń rejısseri Oljas Omarov jeńip aldy. Al, І-oryn «Balyq sorpa» beınefılminiń rejısseri Álisher Jádigerovke buıyryp, Bas júldege «Anama» beınefılminiń rejısseri Jandos Babahanov laıyq dep tanyldy.

Úzdik fılm rejısserleri men úzdik nomınatsııa ıegerlerin oblys ákiminiń orynbasary Erbol Sadyr marapattap, arnaıy alǵys hat pen qarjylaı syılyqtar tabys etti.