Túrkistan oblysynda «Saqshy» jobasy bastaldy

TÚRKІSTAN. QazAqparat - COVID-19 koronavırýs ınfektsııasynyń oblysta taralmaýynyń aldyn-alý maqsatynda Túrkistan oblysynda túrli deńgeıdegi sharalar atqarylýda. Osy oraıda, áleýmettik, kásipkerlik nysandar men adam kóp jınalatyn qoǵamdyq oryndardyń jumys rejımi ózgerip, shekteý qoıyldy, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, oblys ortalyǵy Túrkistan qalasynda «Saqshy» arnaıy jobasy bastalyp, reıd júrgizilýde. Túrkistan qalalyq polıtsııa departamentiniń qyzmetkerleri men olardyń qoǵamdyq kómekshileri qala aýmaǵynda dámhana, meıramhana men dúkenderdi aralady. Qoǵamdaǵy ahýaldy qatań baqylaýǵa alǵan azamattar shara barysynda qaýipsizdiktiń qatań saqtalýyn, nysandarǵa kirer esikterde antıseptıkalyq quraldardyń bolýyn tekserdi.

Qoǵamdyq kómekshiler tótenshe jaǵdaı talaptaryn saqtaý jaıly túsindirme jumysyn júrgizdi.

Aldaǵy ýaqytta bul baǵyttaǵy jumystar jalǵasyn taýyp, barlyq kásipkerlik nysandardyń jumys rejımi baqylaýda bolady.

Atap óteıik, QR barlyq aýmaǵynda engizilgen tótenshe jaǵdaıǵa baılanysty Túrkistan oblysynda qaýipsizdikti saqtaý maqsatynda barlyq jergilikti atqarýshy jáne quzyrly organdar kúsheıtilgen rejımde jumys istep jatyr.

Tótenshe jaǵdaı rejıminiń saqtalýy boıynsha birqatar sharalar atqarylyp, 13 nysan ıesi jáne 2 azamat úıinde toı jasaǵany úshin jaýapqa tartyldy.

Jalpy, oblys boıynsha 300-ge jýyq azamat polıtsııa kómekshisi bolyp eńbek etýde.