Túrkistan oblysynda reıd barysynda dárini qymbatqa satýǵa qatysty 39 fakti anyqtaldy
TÚRKІSTAN. QazAqparat – Túrkistan oblysynda reıd barysynda dárini qymbatqa satýǵa qatysty 39 fakti anyqtaldy, dep habarlaıdy QazAqparat tilshisi.
Túrkistan oblystyq Polıtsııa departamentiniń qyzmetkerleri aýdandyq polıtsııa bólimshelerimen jáne basqa da múddeli organdardyń ókilderimen birlese otyryp, kún saıyn reıd jáne jedel-aldyn alý is-sharalaryn júrgizýde.
Mobıldik top Saıram aýdanyndaǵy dárihanalardyń birinde dári-dármekti qymbat baǵaǵa satqanyn anyqtady. Dárihananyń satýshysy belgilengen baǵasy 1 000 teńge «Deksametazon» preparatynyń qaptamasyn 5 000 teńgeden satqan.
Polıtsııa qyzmetkerleri atalǵan dáriniń 100 ampýlasy bar 5 qorabyn tárkiledi. Jınaqtalǵan materıaldar QR Densaýlyq saqtaý mınıstrliginiń Taýarlar men qyzmetterdiń sapasy men qaýipsizdigin baqylaý komıtetine joldandy.
Osyndaı zańbuzýshylyq Túlkibas aýdanynda da tirkeldi. Reıd barysynda jergilikti turǵyn 20 oram «askorbın qyshqylyn» 750 teńgeden, (belgilengen baǵasy 373 tg) jáne «Deksametazon» preparatynyń 2,5 qaptamasyn 2 000 teńgeden (belgilengen baǵasy ár qaptamasy 1 000 tg) satý ústinde ustaldy. Ol atalǵan dáriler óziniń eminen artylyp qalǵandyqtan, satyp jibergisi kelgenin jetkizgen.
Osylaısha jedel toptar oblys aýmaǵynda dárilerdi qymbat baǵamen satýdyń 39 faktisin anyqtady.
«Sonymen qatar Túlkibas aýdanynda karantın jarııalanǵannan beri polıtsııa qyzmetkerleri 67 quqyqbuzýshylyqty anyqtaldy. Onyń 57-si QR ÁQBtK-niń 425-baby «Halyqtyń sanıtarııalyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý« boıynsha jáne 10-y QR ÁQBtK-niń 364-baby «jalpy sý paıdalaný erejelerin buzý« boıynsha tirkelip, 10 ákimshilik hattama toltyrylǵan. Qazirgi ýaqytta polıtsııa karantındi saqtaý boıynsha profılaktıkalyq jumysyn jalǵastyrýda», delingen habarlamada.
