Túrkistan oblysynda reseılik nómerli kólikter jasaǵan jol apatynan 52 adam qaza tapty
NUR-SULTAN. QazAqparat – Túrkistan oblysynda jyl basynan Reseı nómerli kólikpen 150 jol apaty bolǵan. Bul jaıynda atalǵan óńirdiń Polıtsııa departamentinen málim etti, dep habarlaıdy QazAqparat tilshisi.
«Túrkistan oblysynda jyl basynan beri Reseı kólikterimen 150 jol-kólik oqıǵasy oryn alyp, saldarynan 52 adam qaza tapty jáne 151 adam jaraqat aldy. Buǵan qosa jol erejesin elemeıtin júrgizýshiler sheteldik, tirkeýsiz avtokólikterimen 55 myńǵa jýyq ákimshilik quqyq buzýshylyq jasaǵany belgili boldy. Olarǵa 900 mıllıonnan astam aıyppul salyndy», - dep atap ótedi departamentten.
Vedomstvonyń naqtylaýynsha, onyń ishinde belgilengen júrý jyldamdyǵyn arttyrǵan 23 683 júrgizýshi anyqtaldy. Jolaýshylardy nemese júkterdi tasymaldaý, qaýipsizdik beldikterin, motoshlemderdi paıdalaný jónindegi talaptardy saqtamaýdyń – 4 485, jol qıylystarynan ótý qaǵıdalaryn buzyp, joldyń júrý bóligin kesip ótýdiń - 1 378, jol belgileri men joldyń júrý bóligindegi belgilerde kórsetilgen talaptardy saqtamaýdyń 4 479 deregi áshkerelengen.
«Al QR ÁQBtK-niń 602-baby boıynsha - 3 836, 614-baby boıynsha - 2 509, 630-baby «boıynsha 2 560 fakti oryn aldy», - delingen taratylǵan aqparatta.
