Túrkistan oblysynda rekordtyq kólemde aýyl sharýashylyǵy ónimi jınalǵan
NUR-SULTAN. QazAqparat – Túrkistan oblysynda 3,3 mln tonna aýyl sharýashylyǵy ónimi jınalyp, rekordtyq kórsetkishke qol jetkizildi. Bul týraly óńir ákimi Ómirzaq Shókeev aıtyp berdi, dep habarlaıdy QazAqparat tilshisi.
«Bıyl 805,3 mlrd teńgege aýyl sharýashylyǵy ónimi óndirildi, aýyl sharýashylyǵy daqyldary 842,4 myń gektar jerge egildi. Egistikti ártaraptandyrý júrip jatyr, ıaǵnı sýdy kóp tutynatyn maqta, kúrish sııaqty daqyldar qysqaryp, kókónis, baqsha, kartop ónimderi kóbeıdi. Olardyń túsimdiligi ortasha 20 tsentnerge ósip, ótken jyldan 500 myń tonnaǵa artty. Jalpy óńirde 3,3 mln tonna ónim jınalyp, rekordtyq kórsetkish boldy», - dedi Ó. Shókeev Ortalyq kommýnıkatsııalar qyzmetinde ótken baspasóz máslıhatynda.
Ákimniń aıtýynsha, óńirdegi jylyjaılar da keńeıip jatyr, onyń jalpy kólemi 1 440 gektarǵa jetedi. Bul respýblıkanyń 71 %-yn quraıdy.
«Bir alqaptan jylyna 2-3 ónim alý» jobasy aıasynda 8,9 myń ga 2 878 joba iske asyp, 280 myń tonna kókónis ónimi jınaldy. Respýblıkada sýarmaly jerlerdiń úshten biri oblysqa tıesili. Aǵyn sýdy tıimdi paıdalaný maqsatynda ylǵal únemdeý tehnologııalaryn engizý jolǵa qoıyldy. Búgingi tańda oblysta 4 myń gektarǵa jańbyrlatyp sýarý jáne 25,5 myń gektarǵa tamshylatyp sýǵarý tehnologııalary engizildi. Budan bólek, sońǵy 2 jylda 172 shaqyrym 23 kanalǵa jóndeý jáne 241 shaqyrym 121 qashyrtqyǵa mehanıkalyq tazalaý jumystary júrgizildi. Nátıjesinde 92 myń ga sýarmaly jerdiń melıoratıvtik jaǵdaıy jaqsardy», - deıdi Ó. Shókeev.
«Mal sharýashylyǵynda mal basy men ónimdilik 5%-ǵa artyp, 291,4 mlrd teńgege ónim óndirildi. Et eksporty boıynsha oblys respýblıkada 1-orynda tur. Bıyl aýa-raıynyń qýańshylyǵyna baılanysty bolǵan mal azyǵy tapshylyǵyn joıý maqsatynda aýqymdy jumystar atqaryldy. Sonyń nátıjesinde mal azyǵyn daıyndaý jospary 108%-ǵa oryndalyp, 4 mln tonnadan astam azyq jınaldy», - deıdi óńir basshysy.
