Túrkistan oblysynda prokýrorlar 3300 ga jerdi memleketke qaıtartqyzdy

TÚRKІSTAN OBLYSY. QazAqparat – Túrkistan oblysynda prokýrorlar 3300 ga aýyl sharýashylyǵy maqsatyndaǵy jerdi memleketke qaıtartqyzdy, dep habarlaıdy QazAqparat Túrkistan oblystyq prokýratýrasynyń baspasóz qyzmetine silteme jasap.

Baspasóz málimetterine qaraǵanda, Qazaqstan Respýblıkasynyń Jer kodeksiniń 48-baby 1-tarmaǵynyń talaptaryna sáıkes (2009 jyldyń 13 aqpanynda engizilgen ózeristerge sáıkes) erekshe jaǵdaılardy qospaǵanda, memlekettik jer ýchaskelerine jeke menshikke nemese paıdalaný quqyǵyn berý - tek saýda-sattyqtarda (konkýrstarda, aýktsıondarda) júzege asyrylady.

Alaıda jalpyǵa mindetti zań talaptaryn oryndamaı, myńdaǵan gektar jaıylymdyq jáne aýyl sharýashylyǵy maqsatyndaǵy jerlerdi Shardara aýdany ákimdigi úshinshi tulǵalarǵa uzaq merzimge óteýli quqyǵymen paıdalanýǵa konkýrs (aýktsıon) ótkizbesten, zańsyz tabystaǵan.

Atalǵan jerlerdi jalǵa berý kelisimsharttaryn jaramsyz dep taný týraly Túrkistan oblysynyń jer ınspektsııasy sotqa talapmaryzdar bergen.

Biraq Túrkistan oblysynyń mamandandyrylǵan aýdanaralyq ekonomıkalyq soty bul jaǵdaıǵa basqasha qarap, talap aryzdardy berý merzimderdiń ótýine silteme jasap, birneshesin negizsiz qanaǵattandyrýsyz qaldyrǵan.

Oblys prokýratýrasynyń ótinishhattary negizinde apellıatsııalyq satyly sotymen joǵaryda kórsetilgen sotynyń úsh sheshimi buzylyp, talap aryzdar qanaǵattandyryldy.

Nátıjesinde 3300 ga aýyl sharýashylyǵy maqsatyndaǵy jerler memleketke qaıtaryldy.