Túrkistan oblysynda poıyzdyń toqtatý kranyn qosqan jolaýshy jaýapkershilikke tartyldy

NUR-SULTAN. QazAqparat – Bıyl segiz aıda ІІM Kóliktegi polıtsııa departamenti poıyzdardyń toqtatý kranyn iske qosqan 27 faktini tirkedi, dep habarlaıdy QazAqparat departamenttiń baspasóz qyzmetine silteme jasap.

«5 qyrkúıekte Jambyl oblysynyń «Býrylbaıtal-Qarasaı» aralyǵynda toqtatý kranyn qoldanýyna baılanysty «Nur-Sultan-Nurly jol – Almaty-2» baǵytyndaǵy jolaýshylar poıyzy kenet toqtaǵan. Josparlanbaǵan aıaldaý 4 mınýtqa sozyldy. Tekserý barysynda kólik polıtseıleri zańǵa qaıshy áreket jasaǵan jolaýshyny anyqtady. Ol Túrkistan oblysynyń 42 jastaǵy turǵyny bolyp shyqty. Onyń mas kúıinde toqtatý kranyn julyp alǵany anyqtaldy», – dedi Kóliktegi polıtsııa departamentiniń bastyǵy Ońal Bekeev aıtty.

Medıtsınalyq kýálandyrýdyń qorytyndysyna sáıkes onyń «ortasha dárejedegi» masań kúıde bolǵany anyqtaldy.

Toqtatý krany tek erekshe jaǵdaıda ǵana qoldanylady, ıaǵnı vagonda jolaýshylardyń ómirine nemese qozǵalys qaýipsizdigine qaýip tóndiretin aqaý paıda bolǵan kezde, sondaı-aq órt shyqqan jaǵdaıda ǵana paıdalanýǵa ruqsat etiledi. Poıyz kópirde nemese kópirdiń astynda jáne jolaýshylardy evakýatsııalaýǵa jol bermeıtin basqa da jerlerde turyp qalǵan jaǵdaıda ony qosýǵa bolmaıdy.

«Kólik saqshylary quqyq buzýshyny poıyzdan túsirip, QR ÁQBtK – niń 440-baby 1-bóligi, ıaǵnı ishimdik ishý nemese qoǵamdyq oryndarǵa masań kúıde kelý jáne 560-babynyń 1-bóligi, ıaǵnı qajetsiz rette poıyzdy zańsyz toqtatý boıynsha ákimshilik hattamalar toltyrdy», - dedi O.Bekıev.

Onyń aıtýynsha, jyl basynan beri ártúrli ákimshilik quqyq buzýshylyq jasaǵany úshin kólik polıtseıleri 30 667 adamdy ustady, onyń ishinde ishimdik ishkeni nemese qoǵamdyq oryndarǵa mas kúıinde kelgeni úshin – 3 186 azamatty ákimshilik jaýapkershilikke tartty. Sondaı-aq, toqtatý kranyn julyp alýǵa qatysty 27 jaǵdaıy tirkelgen.