Túrkistan oblysynda poshta qyzmetkeri sybaılastarymen birge 35 mln teńge jymqyrǵan

TÚRKІSTAN. QazAqparat – Túrkistan oblysynyń polıtseıleri ózi jumys isteıtin mekemeden 35 mıl teńge jymqyrǵan poshta qyzmetkeri men onyń 2 sybaılasyn ustady, dep habarlaıdy QazAqparat Túrkistan oblystyq Polıtsııa departamentiniń baspasóz qyzmetine silteme jasap.

Baspasóz qyzmetiniń málimetterine qaraǵanda, Saryaǵash aýdandyq polıtsııa bólimine aýdandaǵy poshtalardyń biriniń qyzmetkeri aryzdanyp, mekemege tıesili 35 mıllıon teńgege jýyq aqshany belgisiz adamdardyń qoldy etkenin jetkizgen.

Atalǵan jaıtty saryaǵashtyq polıtseıler QR QK-niń 190-baby «Alaıaqtyq» boıynsha tirkep, qajetti sharalardy atqardy. Oqıǵa bolǵan mekemege barǵan tártip saqshylary beınekameralardyń jazbalaryn muqııat tekserip, aıǵaqty zattardy izdeı bastady. Birneshe kúnge sozylǵan jumystar kezinde kúdikti retinde poshta qyzmetkeri, ıaǵnı jas jigit anyqtaldy. Ustalǵan jigit Saryaǵash aýdanynyń turǵyny.

Sondaı-aq tergep-tekserý barysynda ustalǵan jigitke qylmysty júzege asyrý úshin kómektesken 2 sybaılasy, ıaǵnı er azamattar anyqtaldy. Olardyń biri jergilikti turǵyn bolsa, ekinshisi Semeı qalasynyń turǵyny.

Belgili bolǵandaı poshta qyzmetkeri qasyndaǵy 2 sybaılasymen birge aldyn ala sóz baılasyp, mekemeniń qoryna jınalǵan 35 000 000 teńgeni shotyna aýdaryp jiberý arqyly jymqyrǵan. Qoldy etken qomaqty qarjyny ózara bólisip alǵan.

Qazirgi tańda ustalǵan 3-eý qamaýǵa alyndy. Olarǵa qatysty sotqa deıingi tergeý amaldary júrgizilýde. Oqıǵanyń basqa da tolyq mán-jaıy tergeý barysynda anyqtalatyn bolady.