Túrkistan oblysynda poshta qyzmetkeri 3,8 mln teńgeni alyp, qashyp ketken
TÚRKІSTAN. QazAqparat - Túrkistan oblysynda poshta qyzmetkeri iri kólemdegi aqshany zańsyz ıemdenip, qashyp ketken, dep habarlaıdy QazAqparat oblystyq PD baspasóz qyzmetine silteme jasap.
«29 qarasha kúni Otyrar aýdandyq polıtsııa bólimine poshtalardyń birinen qatynas hat kelip túsken. Onda mekemeniń bir qyzmetkeri bótenniń aqshasyn zańsyz ıemdenip, belgisiz baǵytqa boı tasalaǵany aıtylǵan. Atalǵan jaıt Otyrar polıtsııa bóliminde tirkelip, sotqa deıingi tergeý amaldary bastaldy. Qyzmetkerlerden quralǵan jedel tergeý toby oqıǵa ornyna kelip, mekeme qyzmetkeriniń jalaqyǵa bólingen 3 800 000 teńge aqshany alyp ketkenin anyqtady» delingen habarlamada.
Tártip saqshylarynyń jedel izdestirý sharalarynyń nátıjesinde kúdikti Taraz qalasynan ustaldy. Tergep-tekserý barysynda aıǵaq zat retinde urlanǵan aqshanyń bir bóligi, ıaǵnı 1 mıllıon teńgesi tárkilendi. Qalǵan aqshany ol óz qajetine jaratyp jibergen. Kúdiktiden qolhat alynyp, úıine jiberilgen.
Qazirgi tańda sotqa deıingi tergeý amaldary júrgizilýde.
