Túrkistan oblysynda polıtsııa joǵalǵan 13 jasar balany taýyp, otbasyna qaıtardy
TÚRKІSTAN. QazAqparat – Túrkistan oblysynyń polıtseıleri joǵalǵan 13 jasar balany Tarazdan taýyp, otbasyna qaıtardy, dep habarlaıdy QazAqparat Túrkistan oblystyq polıtsııa departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, Túrkistan oblysynyń Keles aýdandyq polıtsııa bólimine jergilikti turǵyndardyń biri kelip 2006 jylǵy ulynyń úıden belgisiz baǵytqa shyǵyp ketip, sodan qaıta oralmaǵanyna shaǵymdanǵan. Ulynyń aman-esen oralýy úshin kómek berýin suraǵan aq jaýlyqty anaǵa polıtseıler kómek kórsetti.
Atalǵan jaıt Keles aýdandyq ishki ister bóliminiń sotqa deıingi tergeýdiń biryńǵaı tizilimine engizilip, aýdandyq polıtseıler balany tabý jumystaryna shuǵyl kirisken.
Tártip saqshylary oblys boıynsha ár aýdan qaladaǵy polıtsııa bólimderi men basqarmalaryna habar berip, jedel-izdestirý jumystaryn júrgizdi. Jaqyn aımaqtardy aralap, balanyń barýy múmkin degen jerlerdi muqııat tekserdi.
Nátıjesinde joǵalǵan 13 jastaǵy balanyń Taraz qalasyndaǵy kámelet jasyna tolmaǵan balalardy beıimdeý ortalyǵynda ekendigi anyqtaldy. Aqparat kózderi arqyly aýdannyń eki polıtseıi, balanyń anasy, aǵasy Taraz qalasyna baryp, joǵalǵan balany taýyp alyp, otbasyna aman-esen qaıtardy.
Tergeý barysynda kámelet jasyna tolmaǵan bala, budan aldynda úıinen ketip, 2 kúnnen keıin Shymkent qalasynan tabylǵandyǵy anyqtaldy. Polıtseıler tekserý jumystary aıasynda bul joly onyń úıinen aqsha alyp ketkenin anyqtady. Sodan Keles aýdanynyń ortalyǵy Abaı aýylyna barǵan, odan ary Shymkent qalasyna jetken. Qyzyq qýǵan bala munymen qaıtpaı, qalaaralyq avtobýsqa otyryp, Taraz qalasyna barǵan. Osynda konkı tebetin oryndarda qydyrǵan. Osy kúnder aralyǵynda avtovokzaldarda túnegen.
Kámelet jasyna tolmaǵan balanyń qaraýsyz júrgenin baıqaǵan avtovokzaldaǵy qaraýyl tıisti mekemege habarlasqan. Joǵalǵan balanyń tártip saqshylaryna aıtýynsha, ol jáı qydyryp júrgen. Bul jaǵdaıǵa asa mán bergen polıtseıler tıisti sharalardy júrgizip, esepke qoıý máselelerin jasaýda.
