Túrkistan oblysynda polıtseıler jolda qalyp qoıǵan 12 kólik júrgizýshisine kómektesti
TÚRKІSTAN. QazAqparat – Túrkistan oblysynda polıtsııa qyzmetkerleri jolda qalyp qoıǵan 12 kólik júrgizýshisine kómektesti, dep habarlaıdy QazAqparat Túrkistan oblysynyń Polıtsııa departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, polıtsııa qyzmetkerleri aǵa leıtenant Ǵalymjan Jaqsylyqov pen leıtenant Almat Smandııarov Almaty-Tashkent-Termez trassasynyń 647 shaqyrymynda kezekti patrýldeý kezinde jol jıegindegi qar qursaýynan shyǵa almaı qalǵan júk kóligin baıqaıdy. Aýa raıynyń qolaısyzdyǵy men qardyń qalyńdyǵy kólikke kedergi keltirgen. Polıtseıler kólik júrgizýshisimen birge dóńgelek astyndaǵy qardy tazalap, jolǵa qum sebedi. Osydan soń júrgizýshi saparyn qaıta jalǵastyrady.
Jalpy qys bastalǵan bir aıda Túrkistan oblysynyń polıtseıleri jolda túrli jaǵdaılarmen turyp qalǵan 12 kólik júrgizýshisine kómek kórsetken.
«Júk kóligi Taraz baǵytyna qaraı jolǵa shyqqan eken, kómek kerek bolǵanyn túsinip, toqtap, ary qaraı júrip ketýine kómektestik. Negizi biz jolda patrýldeıtin bolǵandyqtan, mundaı jaǵdaılarmen jıi ushyrasamyz. Jaqynda ǵana jol jıeginde kóligi buzylǵan júrgizýshini kórip, kólikti súıreıtin avtokólikti shaqyryp, jaqyn mańdaǵy avtoservıske jetkizgen bolatynbyz. Sondaı-aq kóliginiń janar-jaǵarmaıy taýsylyp qalǵan júrgizýshige qajettisin jetkizip berdik» - deıdi polıtsııa qyzmetkeri Almat Smandııarov.
Polıtsııa azamattarǵa jolǵa shyqqanda birinshi kezekte qajetti zattaryn janynda alyp júrý jáne jol júrý erejesin buzbaý kerektigin eskertedi. Al aýa raıy qolaısyz bolǵan kezde jolǵa shyqpaǵan jón.
