Túrkistan oblysynda polıtseıler «Jolda qabyldaý» aktsııasyn uıymdastyrdy
TÚRKІSTAN. QazAqparat – Túrkistan oblysynda polıtseıler «Jolda qabyldaý» aktsııasyn uıymdastyrdy. Atalǵan sharada jergilikti turǵyndar ózderin mazalaǵan suraqtar men aıyppuldar jaıly keńes aldy, dep habarlaıdy QazAqparat tilshisi.
Eki kúnge sozylatyn aktsııa barysynda tártip saqshylary turǵyndardyń jan-jaqsy saýaldaryna jaýap berdi. Azamattar biraz jyl buryn satyp jibergen kólikteriniń atyna kelgen aıyppuldardy tóleý jaıyn kóterdi. Polıtseıler atalǵan máselelerdiń keıbireýlerin osy jerde sheshse, keıbiriniń mindetti túrde zań turǵysynda qaralatyndyǵyn jetkizdi. Sondaı-aq turǵyndarǵa kólik satqanda tolyq tirkeýden shyǵarýdy jáne jańadan tirkeýdi múmkindiginshe belgilengen talaptarǵa saı jasaýdy, eshbir qujattandyrý jaǵdaıyna salǵyrttyq tanytpaýdy túsindirdi. Túrkistan oblysy Polıtsııa departamenti bastyǵynyń birinshi orynbasary A. Seıdýalıev turǵyndardy arnaıy qabyldap, saýaldaryna jaýap berdi.
«Jurtshylyqqa quqyqtyq kómek kórsetý men quqyq qorǵaý salasy qyzmetkerlerine azamattardyń senimin arttyrý, el-jurt arasyndaǵy baılanysty nyǵaıtýda bul aktsııanyń bereri mol. Qabyldaýda óz quqyqtary men quqyq qorǵaý organdarynyń jumysyna beı-jaı qaramaıtyn azamattardyń jolda júrý erejelerin bilýin, olardyń saqtalýy jáne aktsııaǵa qatysýshylardyń aıtar muń-muqtajy men pikirlerin tyńdadym, sheshilý joldaryn qarastyrdyq. Belsendi turǵyndarǵa rahmetimizdi aıtamyz», -dedi A. Seıdýalıev.
Aıta keteıik, óńirde kezekti «Jolda qabyldaý» aktsııasy ádettegideı front-ofısterde ótti. Qabyldaýǵa kelgen turǵyndardyń basym kópshiligi joldardaǵy tártipsizdik pen jol belgileri, júrgizýshi kýálikterin aýystyrý tártibi men avtokólikterin tirkeý máselelerine qatysty boldy.
Esterińizge sala ketsek, aktsııanyń negizgi maqsaty jergilikti turǵyndardyń polıtseılerge qatysty ártúrli máseleleriniń jedel sheshilý jolyn qarastyrý, jalpy halyqpen keri baılanysty nyǵaıtý bolyp tabylady. Aktsııa aıasynda, turǵyndar tarapynan aıtylǵan bolmasa áleýmettik jeli arqyly kelip túsken suraqtar jiti nazarǵa alynyp, qajetti sharalar jasaldy.
