Túrkistan oblysynda polıtseıler zeınetkerdiń urlanǵan aqshasyn taýyp berdi
TÚRKІSTAN. QazAqparat - Túrkistan oblysynda polıtseıler zeınetkerdiń urlanǵan aqshasyn taýyp berdi. Belgisiz bireýler qarııanyń úıine kirip, senimine ıe bolý arqyly aqshalaryn kúshpen tartyp alǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, atalǵan qylmys naýryz aıynda Saıram aýdanynyń ortalyǵynda bolǵan.
«Aqsýkent aýylynyń egde jastaǵy turǵyny tonaý jaıty boıynsha Saıram aýdandyq polıtsııa bólimine aryzdanǵan. Qylmysty ashý úshin polıtsııa basqarmasynan jedel-tergeý toby qurylyp, qylmyskerdi izdeý sharalary júrgizilgen. Polıtseıler kúdiktini bir táýlik ishinde qolǵa túsirdi. Ol buryn alaıaqtyq áreketi boıynsha, jaýapqa tartylǵan Saıram aýdanynyń turǵyny bolyp shyqty. Qazirgi tańda tonaý jaıty boıynsha sotqa deıingi tekserý amaldary júrgizilýde»,-delingen habarlamada.
Tergeýshiler ustalǵan seziktiniń taǵy da basqa osy sııaqty qylmystyq jaıttarǵa qatysy bar-joǵyn anyqtaýda. Al, aıǵaqty zat retinde tárkilenip alynǵan aqshalar zańdy ıesine tapsyryldy. 88 jastaǵy zeınetker Saıram APB-nyń jeke quramyna jáne ýchaskelik ınspektoryna qylmysty ashý barysynda kásibılik pen jedeldilik tanytqandary úshin alǵysyn aıtty.
