Túrkistan oblysynda polıtseıler turǵyndarǵa túsindirme jumystaryn júrgizdi
TÚRKІSTAN. QazAqparat – Túrkistan oblysynda polıtseıler «Jolda qabyldaý» aktsııasyn uıymdastyryp, turǵyndarǵa túsindirme jumystaryn júrgizdi. Shara barysynda tártip saqshylary turǵyndardy alańdatqan suraqtarǵa jaýap berdi, dep habarlaıdy QazAqparat tilshisi.
Aktsııada kelýshilerge jol belgileriniń rettiligi, júrgizýshi kýálikterin birinshi ret alý nemese aýystyrý, avtokólikterdi tirkeý zańdylyǵy aıtyldy. Sondaı-aq, turǵyndar tarapynan shetel kólikterin memlekettik tirkeý men aıyppuldardy tóleý, kóshi-qon qyzmeti salasyna qatysty máseleler boıynsha saýaldar qoıyldy. Polıtsııa qyzmetkerleriniń aıtýynsha, «Jolda qabyldaý» aktsııasyn ótkizý arqyly azamattarmen ashyq qarym-qatynas ornatylyp, polıtseılerge degen senim ulǵaıǵan.
«Jolda qabyldaý» respýblıkalyq aktsııasy bastalǵaly 1 jylǵa jýyq ýaqyt boldy. Osy aralyqta turǵyndar tolǵandyryp júrgen saýaldaryn joldap, óz máselesin sheshýde. Búgingi ótkizilgen is-sharada da jurtshylyq ózderiniń usynys-pikirlerin aıtyp, keńes aldy. Barlyq máseleler boıynsha jan-jaqty túsindirme jumystary júrgizildi. Jalpy aktsııanyń basty maqsaty - turǵyndarǵa quqyqtyq keńester berý, jergilikti polıtsııa qyzmetine azamattardyń senimin arttyrý, quqyq qorǵaý organy qyzmetkerleri men azamattar arasyndaǵy baılanysty nyǵaıtý bolyp tabylady»,- deıdi tártip saqshylary.
Aıta keteıik, oblystyq Polıtsııa departamentiniń qyzmetkerleri turǵyndardy «Nur Otan» partııasynyń qoǵamdyq qabyldaý oryndarynda jáne aýdan, qalalyq polıtsııa basqarma, bólimderiniń janynan qurylǵan halyqtyq-keńselerde qabyldaýda. Atalǵan shara búgin keshki saǵat 19:00-ge deıin kezeksiz jalǵasady. Oblys turǵyndary kez kelgen polıtseılerge qatysty saýaldaryn qoıyp, naqty jaýap alýǵa múmkindigi bar.
