Túrkistan oblysynda polıtseıler tolǵaq qysqan áıeldi bosandyrdy
TÚRKІSTAN. QazAqparat - Kentaý QPB Úshqaıyq aýyldyq okrýginiń ýchaskelik polıtsııa ınspektorlary polıtsııa maıory Nurbol Temirhanuly men polıtsııa kapıtany Baqtybaı Qalabaev tolǵaq qysqan áıeldi bosandyryp aldy, dep habarlaıdy QazAqparat TO PD-niń baspasóz qyzmetine silteme jasap.
Olarǵa Jalańtós aýylyna qarasty «Kommýnabaz» mal aýylynyń turǵyny keshki saǵat 20:00 shamasynda habarlasyp, jedel-járdemge qońyraý shalǵanmen ala almaı jatqanyn, áıeliniń, tolǵaǵy qysyp qınalý ústinde ekenin aıtyp kómek suraǵan. Turǵynnyń qońyraýynan keıin polıtseıler tez arada jınalyp, Úshqaıyq aýylynan 50 shaqyrymdaı qashyqtyqtaǵy maldy aýylǵa jol tartady. Jarty saǵat kóleminde dittegen jerge jetip, 21 jasar júkti áıeldi, kúıeýin qyzmettik avtokólikke otyrǵyzyp, joldan aýyldyń feldsherin salyp alyp Kentaý qalasyndaǵy perzenthanaǵa qaraı bet alady. Bul kezde júkti áıel medıtsınalyq kómekke muqtaj edi. Aqyry shydaı almaǵan Rakovıtsa Vıoletta tolǵaǵy qysyp, Túrkistanǵa kireberis jolda bosanyp qalady. Nátıjesinde polıtseılerdiń kómegimen qyzmettik kóliktiń salonynda shekesi torsyqtaı ul bala dúnıege keldi. Kóp uzamaı jedel-járdem brıgadasy kelip, jańa týǵan sábı men anany Túrkistan qalasyndaǵy perzenthanaǵa jetkizedi.
Óz kezeginde erli-zaıyptylar polıtseılerge alǵysyn jaýdyrdy. «Ómirge kelgen kishkentaı bóbektiń aman-esen týylý birinshi kezekte, polıtseılerdiń arqasy. Meniń batyrym - osy ýchaskelik polıtseıdiń kóliginde ómir esigin ashty. Eger, polıtseıler bolmaǵanda aıdaladaǵy maldy aýylda áıelim men balama ne bolaryn kim bilsin? Halyqpen tyǵyz qarym-qatynas ornatqan polıtseılerge úlken rahmet, únemi óz baılanys nómirlerin berip, kómek kerek sátte habarlasyńdar deýshi edi. Shynynda basyma is túskende, oıyma eń birinshi ýchaskelik polıtsııa ınspektory keldi. Jáne ol bizge kómek qolyn sozdy. Tártip saqshylaryna aıtar alǵysym sheksiz deıdi,- jas áke Vıtalıı Barabash.
Búginde anasy men náresteniń jaǵdaıy jaqsy. Úılerine shyqty. Ólim men ómir arasynda bolǵan áıel barlyq jaqsylyǵy úshin polıtseılerge analyq júregimen ystyq yqylasyn bildirdi.
