Túrkistan oblysynda polıtseıler bıyl esirtkimen baılanysty 418 qylmysty anyqtady

TÚRKІSTAN. QazAqparat - Túrkistan oblysy Polıtsııa departamenti Esirtki qylmysyna qarsy is-qımyl basqarmasynyń qyzmetkerleri jyldy qorytyndylady, dep habarlaıdy QazAqparat Túrkistan oblystyq Polıtsııa departamentine silteme jasap.

Departamenttaratqan málimetterge qaraǵanda, oblysta bıyl esirtkiniń zańsyz aınalymyna qatysty 418 derek anyqtalǵan. Onyń 193-i qylmys pen 225-i qylmystyq áreketter. Naqtyraq aıtqanda, esirtki satýdyń 68, asa iri kólemde esirtki saqtaýdyń 15, esirtki kontrabandasynyń 33, esirtki ósimdigin zańsyz egip-ósirýdiń 77 deregi tirkeldi.

Osy rette oblys polıtseıleri jalpy kólemi 6 tn 720 keli esirtki zaty tárkilegendigin aıta ketý kerek. Onyń ishinde esirtkiniń aýyr túri sanalatyn geroın 5 gr, sıntetıkalyq esirtki 4,2318 gr, gashısh 48 keli 046,7 gr, marıhýana 786 keli. Nátıjeli jumystar aıasynda sońǵy eki aıda 5 qylmystyq is anyqtaldy.

Máselen, Qazyǵurt aýdanynyń polıtseıleri QR QK-niń 297-baby 1-bóligimen qylmystyq is tirkedi. ıAǵnı jergilikti turǵyn kúdikti er azamat aýdannyń basqa turǵynyna salmaǵy 3 gramnan asatyn esirtkini satqan. Er azamat qylmys ústinde ustalyp, qamaýǵa alyndy. Al úıin tintý kezinde aýlasynan esirtkisi bar 6 dana qaǵaz orama men 4 dana sirińke qorapshasy alyndy. Olardyń jalpy salmaǵy 195 gramdy quraıdy.

Sondaı-aq dál osy aýdannan esirtkige qatysty taǵy da eki jaıt anyqtaldy. Qazyǵurttyq turǵynnyń birinen 35 gramm esirtkisi bar polıetılen paketi alynsa, ekinshisiniń úıine tintý júrgizý kezinde 53 gramm esirtki zaty tárkilendi. Atalǵan jaıttarǵa baılanysty tergep-tekserý amaldary júrgizilýde.

Óz kezeginde polıtseıler sotqa esirtkige qatysty 173 isti joldap, 167 tulǵa qylmystyq jaýapqa tartyldy.